Java që po hymë do të karakterizohet me mot mjaft të ndryshueshëm.
Fillimi i javës do të jetë mjaft i nxehtë, por i paqëndrueshëm. Temperaturat e larta dhe rrezet e nxehta diellore shpejtë do të zëvendësohen me vranësira dhe rrebeshe lokalisht të fuqishme shiu me vetëtima dhe bubullimë.
Të martën vranësirat do të përfshijnë tërë rajonin dhe po ashtu edhe ulja e ndjeshme e temperaturave. Herë pas here dhe vende-vende priten reshje shiu të cilat pritet të ndërpriten gjatë ditës ose në mbrëmjen e së martës.
Të mërkurën pritet përmirësim afatshkurtër i motit sepse gjatë orëve të natës dhe të enjten pritet një front ri nga Atlantiku i cili do të na sjellë reshje të reja shiu si dhe lokalisht edhe rrebeshe shiu me vetëtima dhe bubullimë.
Pra, shikuar në përgjithësi nga nesër (E Hënë) deri të premten pritet mot mjaft i ndryshueshëm, me periudha me reshje, por edhe me periudha kohore pa reshje. Nga e marta do të jetë më freskët, kurse nga e premta pritet përmirësim i motit dhe ngritje e temperaturave. Ky përmirësim i motit do të vije si rezultat i i depërtimit të masave ajrore më stabile anticiklonike. Priten ngritje të temperaturave, por nuk do të jetë nxehtë sikur kjo fundjavë e cila po na lë.
Fundjava na pret me mot kryesisht stabil dhe relativisht të nxehtë me temperatura maksimale rreth 24-25 gradë Celsius.
Ishte ky parashikimi javor i motit dhe ndryshimet janë të mundshme për shkak se parashikimet afatgjata janë më pak kredibile, megjithatë për çdo ndryshim eventual do tu njoftojmë në postimet tona të përditshme./Meteoballkan
