Vranësira të shpeshta, intervale po ashtu të shpeshta diellore dhe nganjëherë edhe reshje shiu do të karakterizojnë motin gjatë kësaj jave. Temperaturat do të shënojnë rritje për shkak të rrymimeve ajrore nga jugu dhe rrezeve të shpeshta diellore.
Masat e fuqishme ajrore ciklonike do të përqendrohen në Britaninë e Madhe dhe do të shtrihen deri në Evropen qendrore e nganjëherë edhe në Itali dhe Ballkan, ndërsa vise tona do të jenë mes këtyre masave dhe atyre anticiklonike që shtrihen nga Mesdheu dhe Evropa juglindore dhe lindore.
Si pasojë do të kemi rrymime ajrore nga jugu dhe vranësira të herëpashershme nga Mesdheu. Në Shqipëri do të ketë reshje më të shumta shiu sidomos në zona të caktuara duke filluar nga e Marta, ndërsa në Kosovë reshje lokale shiu priten të mërkurën.
Fillimi i javës kryesisht me diell dhe pa reshje. Ngjashëm do të jetë edhe dita e dytë e javës apo e Marta, por vranësira lokale fillojnë të shfaqen dhe rrallë në disa vise edhe riga shiu.
Të Mërkurën reshje më të shumta shiu dhe rrebeshe lokale me vetëtima dhe bubullimë priten në Shqipëri. Pastaj, gjatë ditës reshje të herëpashershme lokale shiu pritet të kapin edhe pjesë të Kosovës dhe Maqedonisë së Veriut. Temperaturat shënojnë ulje të lehta për shkak të vranësirave, por nuk do të mungojnë intervalet kohore me diell.
E Enjtja dhe Premtja pritet të jenë më të ngrohta sepse rrymimet ajrore nga jugu favorizojnë depërtimin e masave më të ngrohta ajrore nga Mesdheu, por të Premten ka mundësi për një sistem frontal me reshje shiu në formë të rrebesheve, prandaj deri në ardhjen e sistemit eventual do të jetë ngrohtë, ndërsa me ardhjen e reshjeve do të ketë ulje të temperaturave.
Atmosfera afër fundjavë dhe gjatë fundjavës do të jetë mjaft dinamike dhe për këtë arsye është shumë vështirë nga sot të përcakohen saktë ecuritë sinoptike, por një duhet të jemi të sigurt se pritet mot mjaft i ndryshueshëm edhe gjatë fundjavë.
Pra, një javë me mot shumë të ndryshueshëm dhe dinamik por njëkohësisht mund të themi se do të jetë një javë e ngrohtë. Reshje të shpeshta shiu parashihen në ditët që i përmendëm më lart dhe gjatë pothuajse tërë javës përpos vranësirave do të ketë edhe ditë me shumë intervale kohore me diell.
Temperaturat do të jenë të larta për këtë periudhë kohore për shkak të rrymimeve të shpeshta ajrore nga jugu, por ndryshojnë shpeshherë në kohën e reshjeva atmosferike, megjithatë pa ndonjë ulje të theksuar.
Java do të jetë mjaft dinamike dhe ndryshimet në parashikim janë më së të mundshme. Për çdo ndryshim eventual do të njoftoheni me kohë në postimet tona të përditshme./MeteoBallkan
