Kjo javë do të fillojë me temperatura të larta por të cilat do të vijnë duke u ulur gradualisht, nga mesjava priten ulje të theksuara të temperaturave sidomos në viset kontinentale, ndërsa uljet e temperaturave do të ndjehet edhe në viset bregdetare por prapëseprapë do të mbetet nxehtë apo thënë më mirë relativisht nxehtë.
Të hënën siç theksuam edhe në postimet tjera në Kosovë priten rrebeshe të lokalizuara shiu me vetëtima dhe bubullimë, ndërsa më të rralla në Maqedoni dhe Shqipëri.
Të martën në Kosovë do të freskohet moti (me ardhjen e rrebesheve lokale) dhe përpos intervaleve diellore priten edhe vranësira dhe lokalisht edhe rrebeshe të fuqishme shiu me vetëtima dhe bubullimë. Në Shqipëri rrebeshe priten në veri, kurse në viset tjera do të mbetet mjaft nxehtë.
Të mërkurën pritet sistemi frontal dhe cikloni si dhe ulja e theksuar e temperaturave në Kosovë së bashku me reshje të dendura shiu dhe vende-vende edhe shtrëngata me vetëtima dhe bubullimë. Gjithashtu vende-vende priten edhe vërshime. Gjatë ditës së mërkurë në Shqipëri do të jetë mjaft nxehtë para kalimit të frontit, kurse me ardhjen dhe kalimin e frontit pasdite vonë dhe gjatë natës priten rrebeshe të fuqishme shiu me vetëtima dhe bubullimë si dhe ulje e temperaturave.
Të entjtën cikloni do të kalojë dhe reshje nuk do të ketë por do të jetë mot i freskët në tërë rajonin, ndërsa edhe të premtën mot i ngjashëm me ngritje të temperaturave, por në fundjavë pritet ciklon i ri me reshje të reja atmosferike posaçërisht të shtunën. Të dielën prapë stabilizim i motit.
Ishin këto disa informacione të përgjithshme për motin në javën që po hymë dhe për çdo ndryshim eventual do tju lajmërojmë në postimet tona të përditshme./Meteoballkan
