Pas një nate dhe mëngjesi që do të jetë mjaft ftohtë dhe me acar, sot gjatë ditës pritet zutje graduale e acarit si rezultat i ngritjes graduale të temperaturave. Masa ajrore pak më të nxehta nga Mesdheu dhe Afrika Veriore do të kenë tendenca që të depërtojnë në drejtim të rajonit tonë, megjithatë netët prapë do të jenë të ftohta. Nëpër lugina ka mundësi që të kemi edhe mjegull. Erërat do të ndryshojnë drejtim dhe do të fillojnë të fryjnë nga jugperëndimi.
Sot si në Kosovë, poashtu edhe në Shqipëri dhe Maqedoni do të mbajë mot kryesisht me diell dhe vranësira kalimtare. Reshje atmosferike nuk pritet të ketë, kurse temperaturat priten te rriten mbi 0 gradë. Mot i ngjashëm do të mbajë edhe nesër, me tendenca të ngritjes së mëtutjeshme të temperaturave ku në disa rajone do të kemi edhe shkrirje të borës.
Nga e Premta në drejtim të rajonit tonë do të fillojnë prapë të depërtojnë masa të lagshta ajrore të cilat vende-vende do të kushtëzojnë reshje shiu dhe bore, varësisht nga temperaturat dhe lartësia mbidetare. Reshje të herëpashershme shiu dhe bore do të ketë edhe gjatë fundjavës në tërë rajonin tonë por nga sonte nuk mundemi saktë të përcaktojmë se ku do të ketë reshje shiu gjegjësisht bore. Normalisht, në viset bregdetare dhe Ultësirën Perëndimore të Shqipërisë priten reshje shiu. Reshje shiu priten edhe në shumë ultësira tjera, kurse në viset kodrinore-malore priten reshje të herëpashershme bore. Kjo vlenë për tërë rajonin tonë.
Sidoqoftë, deri të Premtën do të kemi mot të thatë me netë dhe mëngjese mjaft të ftohta por me ditë më të buta dhe pa reshje atmosferike. Nga e Premta dhe e Shtuna pritet rikthimi i reshjeve atmosferike të cilat do të jenë në formë shiu dhe dëbore varësisht nga pozita gjeografike dhe temperaturat të cilat do të na përcjellin ato ditë.
Informata dhe detaje më të sakta nga nesër në meteoballkan.com./Meteoballkan
