Në Mesdhe në këto çaste kemi konsolidimin e masës së fuqishme, stabile anticiklonike e cila po fuqizohet sidomos mbi territorin e shtetit Italian ku kemi stabilizim të plotë të motit dhe depërtimin e masave mjaft të nxehta ajrore me origjinë nga Afrika veriore.
Temperaturat më të larta nga kjo valë nxehtësie do të jenë në shumë pjesë të Evropes perëndimore dhe qendrore, por edhe në viset tona edhe pse ndoshta do të kemi “prekjen” më periferike të masës së nxehtë ajrore.
Fillimisht u mendua se masa shumë e nxehtë ajrore do të vjen direkt tek ne por ka një devijim të vogël, megjithatë shumë nxehtë do të jetë edhe në viset tona, dukshëm mbi vlerat mesatare për këtë periudhë kohore.
Masa shumë e nxehtë ajrore do të fillojë të përfshijë Spanjën jugore, qendrore e lindore, pastaj Francën, Zvicrën dhe Gjermaninë me temperatura në disa zona deri në 30 gradë Celsius, madje mund të ndodhë edhe ndonjë gradë më lartë. Se bashku me nxehtësinë në Evropë do të ketë sasi shumë të lartë të pluhurit saharian, për dallim nga Ballkani ku njëherë për njëherë nuk pritet të ketë pluhur saharian.
Pastaj i nxehti afrikan do të përfshijë edhe Ballkanin dhe viset tona, por jo me intensitet shumë të lartë.
Kjo valë nxehtësie do të zgjasë afërsisht deri në mesin e javës së re kur pritet të kemi “shembjen” e anticiklonit afrikan dhe depërtimin shumë të mundshëm të fronteve të ftohta nga Atlantiku që mund të destabilizojnë atmosferën./MeteoBallkan
