Edhe në këto çaste Ballkani është i mbuluar pothuajse plotësisht nga vranësira të dendura të cilat po i kushtëzon cikloni i cili po afrohet dhe shumë shpejt pritet të largohet drejt Evropes lindore.
Territoret tona ende gjenden në sektorin e ngrohtë të rrymimeve ajrore nga jugu dhe moti është relativisht i ngrohtë, ndërsa Sllovenia, Kroacia dhe Bosnjë dhe Hercegovina gjenden në sektorin e ftohtë, ngase atje ka depërtuar fronti i ftohtë nga veriu duke ulur temperaturat, madje duke kushtëzuar edhe reshje bore në bjeshkët e këtyre dy vendeve. Përveç Kredarices së Sllovenisë, borë ka filluar të bije edhe në Zavizhan dhe Gorksi Kotor të Kroacisë.
Fronti i ftohtë do të përparojë gradualisht drejt jugut dhe juglindjes duke arritur në Kosovë orëve të natës. Fronti do të hetohet kur do të fillojnë të fryjnë erëra nga veriu të shoqëruara me reshje shiu. Fronti do të shkaktojë ulje të ndjeshme të temperaturave dhe ndoshta edhe fjolla bore në viset më të larta malore.
Nesër (e diele) na pret mot më i qetë, por më i ftohtë sidomos në mëngjes. Gjatë dites do të ketë kthjellime dhe rreze diellore, ndërsa reshje atmosferike nuk pritet të ketë./MeteoBallkan