Pas një vere shumë të nxehtë duket sikur nuk jemi mësuar fare me mot me vranësira të dendura dhe reshje shiu, andaj po na duket se nuk e kemi parë diellin kaherë. Këto po ndikon edhe ulja e madhe e temperaturave.
Cikloni i cili solli reshje të fuqishme mbrëmjen e djeshme në disa vise të Kosovës tanimë është larguar në drejtim të Detit të Zi dhe reshjet janë ndalur ose dobësuar. Edhe pse kemi stabilizim afatshkurtër të motit, prapëseprapë kemi vranësira të dendura dhe temperaturat janë mjaft të ulëta për shkak të rrymimeve ajrore nga veriu.
Kjo gjendje do të vazhdojë pothuajse gjatë tërë kësaj jave me ciklonin e ri i cili pritet të arrijë të enjtën, por ky ciklon ka pësuar një ndryshim të vogël dhe duket sikur do të dyndet më në juglindje të rajonit duke na prekur fare pak. Bazuar në ecuritë më të fundit sinoptike nga e enjta priten reshje të reja shiu kryesisht në jug dhe lindje të Shqipërisë dhe jug dhe lindje të Kosovës si dhe në Maqedoninë Veriore. Ekzistojnë gjasa që viset tjera të mos kenë fare reshje, përpos reshjeve të borës që priten në disa vise kodrinore-malore. Pra, më së shumti reshje nga cikloni i mesjavës priten në Maqedoninë Veriore dhe jug/lindje të Shqipërisë, ndërsa stuhi të fuqishme priten në Greqi, Turqi dhe Bullgari.
Nga fundjava do të fillojë që gjendja të ndryshojë graduslisht. Presioni atmosferik do të rritet dhe rrymimet ajrore nga jugu (ose nga Afrika Veriore) do të rilansohen kështu duke rritur ndjeshëm temperaturat sidomos në fillim të javës së re kur mund të kemi edhe rreze diellore dhe temperatura deri në 20 gradë Celsius. Mbetet te shihet./Meteoballkan
