Fillimi i Marsit po na përkujton se jemi në stinën e dimrit, për shkak të dominimit të masave të ftohta ajrore me origjinë polare. Për shkak të anticiklonit në kontinentin evropian nuk kemi reshje atmosferike, megjithatë Mesdheu ka filluar të aktivizohet dhe gjatë ditëve të ardhshme na pret mot mjaft i ndryshueshëm.
Gjatë fundjavës cikloni mesdhetar me qendër në Afriken veriore pritet të na sjellë reshje të reja lokale atmosferike në formë shiu e bore varësisht nga vendi dhe temperaturat. Në anën tjetër do të vazhdojë ardhja e masave të ftohta ajrore nga verilindja e Kontinentit dhe kombinimi i lagështisë së Mesdheut dhe të ftohtit ruso-polar mund të na sjellë reshje të reja bore.
Deri të premtën pritet të jemi nën ndikimin e masës ajrore kryesisht të thatë anticiklonike. Nga e premta gradualisht do të kemi depërtimin e masave ajrore ciklonike të cilat pritet të sjellin reshje të reja shiu e bore dhe varësisht nga pozita e saktë e ciklonit do të përcaktohen edhe sasia dhe lloji i reshjeve atmosferike. Gjithsesi priten ende reshje bore në viset tona kontinentale sidomos në Kosovë, Shqipërinë lindore, Maqedoninë perëndimore dhe veriun e Malit të Zi.
Në përgjithësi na pret mot mjaft dinamik dhe i pasur me reshje atmosferike gjatë pjesës së parë të muajit Mars. Përmirësim të motit mund të kemi pas datës 10 Mars kur mund të kemi rritje të ndjeshme, por graduale të temperaturave, por kjo mbetet të shihet./MeteoBallkan