Kjo masë e ftohtë ajrore e cila gjendet pikërisht mbi Kosovë (e nënvizuar) po kushtëzon temperatura mjaft të ulëta për këtë periudhë kohore, ndërsa cikloni i fuqishëm sipërfaqësor me qendër në Detin Jon po shkon drejt Greqisë dhe Turqisë. Në anën tjetër kemi edhe ciklonin e shtresave të larta me qendër në Evropen qendrore dhe ky kombinim po kushtëzon këto reshje mjaft intensive në rajonin tonë.
Kjo masë e ftohtë ajrore do të qëndrojë pikërisht mbi Kosovë edhe gjatë fundjavës duke na sjellur vranësira dhe reshje lokale shiu të cilat do të vijnë duke u dobësuar.
Më në fund nga e hëna një masë stabile anticiklonike do të na “shpëtojë” nga ky mot i zymtë dhe i ftohtë.
Rritja e presionit atmosferik në Mesdheun perëndimor do të shtrihet drejt Ballkanit dhe njëkohësisht një kreshtë termike nga Afrika Veriore do të drejtohet drejt rajonin tonë. Kjo nënkupton kthjellim gati të plotë të motit dhe rritje të ndjeshme të temperaturave.
Pas javëve dhe muajve me reshje intensive dhe gati të përditshme vjen stabilizimi i motit nga e diela e sidomos nga e hëna. Edhe të dielën mund të ketë reshje lokale shiu, por nga e hëna na pret mot i kthjellët, i ngrohtë dhe me diell. Stabilizim i motit nuk do të zgjasë më shumë se 5 ose 6 ditë./METEOBALLKAN
