Gjendja sinoptike këto ditë është mjaft dinamike dhe për këtë arsye ka ndryshime të shpeshta të motit dhe ulje-ngritje të shpeshta të temperaturave. Është një gjendje tipike vjeshtore, por temperaturat janë ende mbi mesataren. Pas reshjeve të shiut të ditëve të kaluara patëm mundësinë të kemi dy ose tri ditë mjaft të mira dhe stabile. Edhe sot po mbanë mot mjaft i këndshëm dhe stabil, ndërsa nga nesër gjërat do të ndryshojnë përsëri.
Masat ajrore ciklonike direkt nga veriu i kontinentin kanë filluar të depërtojnë në Evropë dhe Itali e deri në Afrikën veriore. Si pasojë në Mesdhe, gjegjësisht në Itali dhe Adriatik do të kemi krijimin e një cikloni me plotë lagështirë i cili do të na sjellë reshje të dendura shiu nesër fillimisht në Shqipëri dhe në orët e natës edhe në Kosovë dhe Maqedoninë Veriore. Priten ulje të temperaturave dhe reshje bore në viset më të larta malore.
Vende-vende priten rrebeshe intensive shiu me vetëtima dhe bubullimë veçanërisht në Shqipëri dhe Mal të Zi, por duke mos përjashtuar edhe Maqedoninë Veriore dhe Kosovën. Reshjet më të fuqishme priten në jug dhe jugperëndim të Shqipërisë, lokalisht edhe në vise tjera. Gjatë ditës së martë reshjet do të ulën në intensitet ku pritet të kemi alternime, vranësirash, intervaleve kohore me diell dhe rigave të shiut./Meteoballkan
