NASA ka prezantuar të hënën 10 astronautët e rinj që do t’i bashkohen trupës së saj, të përzgjedhur nga një grup prej më shumë se 8,000 aplikantësh, teksa agjencia amerikane po përshpejton planet për t’u rikthyer në Hënë dhe për të përgatitur një mision historik me ekuipazh drejt Marsit.
Grupi përfshin gjashtë gra dhe katër burra – një përbërje e paprecedentë për NASA-n – të cilët, sipas administratorit në detyrë Sean Duffy, janë “më të mirët dhe më të ndriturit e Amerikës”.
“Dhe pikërisht këta njerëz na duhen për të gjithë planet tona të eksplorimit,” deklaroi Duffy. “Ne po kthehemi në Hënë… dhe nuk do ta lejojmë që Kina të na e marrë përpara.”
NASA njoftoi se Anna Menon është personi i parë që i bashkohet trupës së astronautëve pasi ka fluturuar tashmë në orbitë. Ajo mori pjesë në misionin privat Polaris Dawn, i zhvilluar nga SpaceX vitin e kaluar, që arriti në një lartësi më të madhe se çdo fluturim tjetër me ekuipazh prej dekadash dhe realizoi shëtitjen e parë hapësinore të sektorit privat. Menon i bashkohet bashkëshortit të saj, Anil Menon, gjithashtu astronaut i NASA-s që u përzgjodh në vitin 2021.
Astronautët e rinj do të kalojnë dy vjet stërvitje intensive, duke përfshirë mësime në gjeologji, mbijetesë në ujë, shëndetin hapësinor dhe fluturim me avionë të performancës së lartë. Pas kësaj periudhe, ata do t’i bashkohen 48 anëtarëve aktualë të trupës së NASA-s dhe do të jenë të kualifikuar për fluturime në misione të ndryshme.
Deri tani, Stacioni Ndërkombëtar Hapësinor (ISS) ka qenë destinacioni kryesor i astronautëve amerikanë, por NASA pritet ta mbyllë atë në fillim të viteve 2030 dhe të përdorë stacione të reja private. Drejtori i operacioneve të fluturimit në NASA, Norman Knight, tha se disa nga astronautët e rinj do të kenë ende mundësi të vizitojnë ISS, por theksoi se qëllimi kryesor është përgatitja për misione më të guximshme drejt Hënës dhe Marsit.
“Çdo mësim i marrë në stacionin hapësinor ka hapur rrugën për destinacionin tonë të ardhshëm: së pari Hëna – këtë herë për të qëndruar – dhe më pas Marsi,” theksoi Knight.
Megjithëse misionet e para të Artemis drejt Hënës do të përfshijnë astronautë me më shumë përvojë, NASA nuk e përjashton mundësinë që pjesëtarët e rinj të përfshihen në fazat e mëvonshme të programit dhe, ndoshta, në udhëtimin e parë të njerëzimit drejt Marsit.
