Për momentin kemi mot mjaft të nxehtë, me vranësira të shtresave të larta atmosferike, rreze të lehta diellore të cilat pengohen nga këto vranësira dhe gjithashtu ende kemi koncentrim të rërë Sahariane. Temperaturat janë të larta, por edhe ndjesia subjektive e të nxehtit është e lartë për shkak të dendësisë apo lagështisë së ajrit dhe në këtë mënyrë është zagushi.
Pasdite vonë dhe në orët e mbrëmjes pritet të kemi zhvillime të fuqishme të vranësirave konvektive apo vertikale (Cumulonimbus) të cilat do të na sjellin rrebeshe lokale shiu me vetëtima, bubullimë dhe mundësi edhe për breshër. Sistemet e vranësirave (lartë në atmosferë) me rrebeshe pritet të lëvizin nga jugu ose jugperëndimi në drejtim të veriut gjegjësisht verilindjes
Rrebeshet më të fuqishme sipas modeleve priten në perëndim, qendër dhe veri të Kosovës si dhe rajonet përreth ku ka mundësi që lokalisht të ketë edhe procese të bujshme amtosferike si erëra të fuqishme, rrebeshe shumë intensive dhe breshër. Rrebeshet nuk do të jenë barabar të distribuara dhe në disa lokacione priten përmbytje afatshkurtra, kurse lokacione tjera mund të përfitojnë fare pak reshje.
Përndryshe edhe në rajon sot pritet të mbajë mot jashtëzakonisht i paqëndrueshëm sidomos në Serbi, Bosnjë dhe Hercegovinë, Bullgari dhe Rumani ku po ashtu priten stuhi intensive me vetëtima dhe bubullima masive, breshër dhe erëra të fuqishme me mundësi edhe për tornado.
Edhe nesër na pret mot i paqëndrueshëm dhe herë pas here me rrebeshe lokale shiu me vetëtima dhe bubullimë si dhe me ulje graduale të temperaturave, ndërsa ulje më të ndjeshme të temperaturave pritet të kemi nga e enjta.
Në fund vlen të theksohet se reshje sonte nuk priten në pjesën më të madhe të Shqipërisë me përjashtim të veriut-qendër dhe lindjes. Pjesët tjera të vendit do të duhej të presin deri nesër eventualisht pasnesër për të përfituar rrebeshe shiu./Meteoballkan
