Pas shumë ditëve me rrebeshe shiu dhe stuhi të cilat shkaktuan edhe probleme të mëdha në disa vise të Republikës së Kosovës gjendja atmosferike është stabilizuar dukshëm ditëve të fundit, megjithatë nga nesër përsëri mund të kemi destabilizim lokal dhe gradual të motit.
Temperaturat e larta të këtyre ditëve ndezin energjinë në atmosferë dhe çdo depërtim i ajrit të ftohtë dhe jo-stabil mund të shkaktojë “eksplozione atmosferike” siç ndodhi javët e kaluara dhe kjo mund të përsëritet prapë.
Nga Kontinenti evropian kemi frontet të cilat përpiqen të depërtojnë në drejtim të rajonit tonë dhe të shkaktojnë destabilizim të atmosferës dhe një front i fuqishëm pritet të arrijë të martën.
Sidoqoftë gjatë pasdites së sotme mund të kemi zhvillime të izoluara kryesisht në veriperëndim dhe veri të Kosovës, kurse rrebeshet lokale të shiut me vetëtima dhe bubullimë mund të shpeshtohen nesër (E Hënë) pasdite, por prapë mbesin të karakterit lokal. Mund të zhvillohet edhe ndonjë stuhi e fuqishme e izoluar.
Të martën pritet destabilizim i fuqishëm i atmosferës me mundësi dhe gjasa reale për rrebeshe lokalisht të fuqishme shiu me vetëtima, bubullimë dhe mundësi edhe për breshër. Vende-vende mund të ketë stuhi intensive afatshkurtra dhe rrebeshe mjaft intensive, por të gjitha këto kalojnë dhe nga dita e mërkurë përsëri pritet të kemi stabilizim të plotë të motit.
Më së shumti reshje pritet të kemi në disa vise të Kosovës, Maqedonisë së Veriut dhe Malit të Zi dhe më së paku reshje priten në Shqipëri. Disa zona në Shqipëri nuk do të kenë fare reshje sidomos zonat jugore.
Të martën priten edhe ulje të temperaturave dhe freskim i motit, kurse nga e mërkura pritet stabilizim i plotë i motit, por ngritja e temperaturave do të jetë graduale./Meteoballkan
