Vazhdon mot relativisht i ftohtë gjatë javës së parë të muajit Mars në Kosovë dhe rajon. Masa të ftohta ajrore me origjinë nga verilindja dhe lindja e Kontientit vijnë nga periferia e anticiklonit të fuqishëm në Evropen qendrore. Ky anticiklon do të na sjellë disa ditë të thata, pra pa reshje atmosferike dhe të ftohta. Veçanërisht të ftohta do të jenë netët dhe mëngjeset, ngase temperaturat ditore pritet të shënojnë rritje të lehta.
Dita më e ngrohtë e kësaj jave pritet të jetë e premta kur temperaturat maksimale në Kosovë mund të arrijnë deri në 10 gradë Celsius, ndërsa në Shqipëri rreth 15 gradë Celsius.
Temperaturat minimale pritet të ulen deri në -5 gradë Celsius, në viset malore deri në -8 gradë Celsius. Në malet e Shqipërisë në lindje, veri dhe juglindje të vendit ajo pritet të ulet deri në -12 gradë Celsius.
Anticikloni evropian nga e premta dhe e shtuna pritet të shtrihet në drejtim të Skandinavisë, duke mundësuar drejtimin e masave të reja të ftohta në drejtim të rajonit tonë. Në anën tjetër në Mesdhe gjatë fundjavës pritet ardhja e një cikloni të ri që pritet të kushtëzojë reshje të reja atmosferike në formë shiu e bore varësisht nga temperaturat, por sipas të gjitha gjasave priten reshje të reja bore sidomos në viset kodrinore-malore duke mos përjashtuar edhe disa ultësira.
Pra tri deri katër ditët e ardhshme na pret mot kryesisht i thatë, por i ftohtë. Nga e shtuna reshje të reja atmosferike dhe njëherë për njëherë nuk pritet ndonjë stabilizim i plotë i motit dhe po ashtu nuk priten rritje të ndjeshme të temperaturave./MeteoBallkan
