Kjo javë e cila po fillon me vranësira dhe intervale kohore me diell do të vazhdojë me mot të ngjashëm ehde gjatë ditëve të ardhshme ku priten të gjitha ngapak; që nga intervalet e gjata kohore me diell, vranësirat të cilat herë pas here pritet të shoqërohen me reshje shiu, rrebeshe si dhe ndonjë stuhi të fuqishme lokale me shkarkesa atmosferike.
Gati gjatë tërë javës do të jemi nën ndikimin e ciklonit të shtresës së lartë atmosferike (Upper Low).
Rrebeshet e shiut gjatë kësaj jave do të fillojnë të intensifikohen edhe në territorin e Shqipërisë, ngase pritet që cikloni të “transferohet” diku në Detin Jon. Rrebeshet do të jenë prezente sidomos në zonat kontinentale, por nganjëherë edhe në zonat bregdetare priten rrebeshe dhe stuhi afatshkurtra shiu.
Përderisa ndikimi i ciklonit fillon të zbehet gradualisht temperaturat fillojnë të rriten.
Pra, në përgjithësi që nga sot (e hënë) deri të premtën na pret mot me intervale kohore me diell dhe zhvillime të fuqishme konvektive kryesisht pasditeve dhe mbrëmjeve. Reshjet nuk pritet të jenë të balancuar, prandaj në shumë vise priten rrebeshe intensive e në disa vise reshje të pakta.
Nga e premta do të kemi rritje të temperaturave dhe më shumë intervale kohore me diell, mirëpo do të mbesin ende gjasat për rrebeshe të izoluara shiu me vetëtima dhe bubullimë.
Rrebeshe gjatë kësaj jave priten në tërë rajonin, që nga Mali i Zi, pastaj Kosova, Lugina e Preshevës, Maqedonia Veriore dhe Shqipëria; diku më shumë e diku më pak. Gjithnjë do të ketë gjasa për krijimin e disa shtrëngatave të fuqishme. Edhe pse jemi nën ndikimin e ciklonit temperaturat nuk shënojnë ulje të theksuara, përkundrazi ato pritet të pësojnë rritje graduale gjatë javës, përpos në momentet e stuhive dhe rrebesheve të shiut normalisht se do ndjehet një rënie rapide afatshkurtër e temperaturave.
Ishte ky parashikimi javor i motit me disa fjalë dhe nëse ka ndonjë ndryshim eventual ne do ju lajmërojmë në postimet tona të përditshme në MeteoBallkan.