Kjo javë do të karakterizohet me mot të nxehtë përvëlues afrikan në tërë rajonin tonë ku temperaturat në Kosovë pritet të arrijnë deri në 39-40 gradë Celsius, në Shqipëri dhe Maqedoninë Veriore vende-vende temperatura mund të arrijë deri në 42-43 gradë Celsius, pra varësisht nga relievi, pozita gjeografike mikro-klima dhe faktorë tjerë meteorologjik. Nxehtësia verore pritet të jetë mjaft intensive dhe normalisht në asfalt dhe viset urbane ku ka shumë betonizim temperatura pritet të shkojë edhe më lartë për shkak të betonit, asfaltit, mungesës së gjelbërimit dhe hijeve, por kjo nuk është matje empirike sipas standardeve meteorologjike dhe nuk llogaritet.
Sidoqoftë, para nesh një javë mjaft e nxehtë dhe me diell si në Kosovë, po ashtu edhe në territoret tona përreth. Në Kosovë mund të kemi një lehtësim dhe freskim afatshkurtër sot pasdite vonë dhe të mërkurën pasdite vonë ku mund të ketë zhvillime lokale të vranësirave konvektive ose vertikale. Priten edhe rrebeshe të izoluara shiu me vetëtima, bubullimë dhe breshër. Mund të krijohet edhe ndonjë shtrëngatë e izoluar, por e fuqishme shiu. Më shumë gjasa për rrebeshe shiu do të ketë veriu(veriperëndim-verilindja) i vendit. Rrebeshe të izoluara shiu mund të ketë edhe në veri të Malit të Zi, dhe rrallë disa vise në Shqipëri dhe Maqedoninë Veriore.
Temperaturat shënojnë rritje të mëtutjeshme nga e enjta dhe për fundjavë kur pritet edhe kulminacioni i nxehtësisë afrikane dhe kur gjasat për rrebeshe dhe freski pritet të jenë shumë të pakta dhe pothuajse inekzistente.
Pra, para nesh vala më e re e nxehtësisë afrikane dhe rekomandohet kujdes i madh sidomos për fëmijët, të moshuarit dhe personat me sëmundje kronike të mos dalin direkt në rrezet diellore sidomos gjatë orëve të mesditës. Në kulmin e vapës temperatura mund të prekë 40 edhe në Kosovë, por kjo mbetet të shihet dhe të përcillet, ndërsa në rajon më gjerë ajo mund të shkojë deri në 42-43 gradë Celsius. Freskim në disa rajone në Kosovë pritet të kemi sot dhe të mërkurën pasdite vonë./Meteoballkan
