Vjeshta po vjen me hovin e saj dhe këtë do ta ndjejmë gjatë kësaj jave kur ditët vjeshtore do të zëvendësojnë këto ditë të bukura të verës së vonshme.
Fillimi i javës siç po e shohim është i nxehtë, ngase jemi nën ndikimin e masave të nxehta ajrore me origjinë nga Afrika Veriore. Po ashtu kemi mot jashtëzakonisht të thatë për shkak të ndikimit të masave të thata ajrore anticiklonike.
Mirëpo, gjendja sinoptike do të fillojë të ndryshojë shumë shpejt sidomos nga dita e mërkurë dhe e enjte kur masa të fuqishme ajrore ciklonike depërtojnë dhe zhvillohen në Mesdhe për të ndryshuar kushtet e motit edhe tek ne.
Edhe nesër (e Martë) pritet mot kryesisht me diell dhe mjaft i nxehtë për këtë periudhë kohore. Nga e mërkura në tërë rajonin do të kemi shtim të konsiderueshëm të vranësirave të cilat do të vijnë duke u dendësuar dhe të enjtën do të fillojnë edhe reshjet e shiut në Kosovë. Në Shqipëri dhe Mal të Zi reshjet lokale të shiut do të fillojnë të mërkurën, ndërsa në Kosovë dhe Maqedoninë Veriore sipas të gjitha gjasave reshjet do të fillojnë të enjten.
Priten ulje të temperaturave dhe atmosferë e vërtetë vjeshtore sidomos nga e enjta e tutje. Reshjet e shiut vende-vende pritet të jenë intensive sidomos në Shqipëri.
Këto reshje do të vijnë si pasojë e ardhjes së fushave të fuqishme ajrore me presion të ulët atmosferik nga Mesdheu dhe ditëve të ardhshme priten ndryshime të vogla në sasinë dhe vendin se ku priten reshjet më të mëdha. Për çdo ndryshim do të njoftoheni me kohë në postimet tona të përditshme./Meteoballkan
