Java e dytë e Gushtit në rajonin tonë do të karakterizohet me mot mjaft të ndryshueshëm dhe jo-stabil. Përpos intervaleve të gjata kohore me diell, shpeshherë priten edhe vranësira dhe rrebeshe shiu. Dita e parë e javës pritet të jetë më e nxehta në viset kontinentale, ndërsa nga e marta do të ketë ulje të temperaturave sidomos gjatë kohës së ndonjë stuhie të cilat priten nga e marta pasdite.
Pra, sot (e hënë) pritet mot kryesisht me diell, me mundësi për zhvillime të izoluara pasdite sidomos në Shqipëri, por edhe në disa vise të Kosoves e Maqedonisë së Veriut. Zhvillime dhe rrebeshe të fuqishme shiu sot në priten në Mal të Zi, ndërkohë që temperaturat e larta mbesin prezente në rajon, përpos Malit të Zi ku pritet freskim i motit.
Nga e marta (nesër) pasdite pritet destabilizim i përgjithshëm i atmosferës dhe ulje e temperaturave. Po ashtu priten zhvillime të fuqishme të vranësirave konvektive të cilat do të kushtëzojnë rrebeshe lokalisht të fuqishme shiu me vetëtima, bubullimë dhe mundësi për breshër. Ka gjasa për krijimin e disa shtrëngatave të fuqishme lokale, prandaj apelohet për kujdes të shtuar.
Rrebeshe shiu priten më së shumti në viset kontinentale të Kosoves, Shqipërisë, Maqedonisë së Veriut, Malit të Zi dhe Luginës së Preshevës, por nuk përjashtohet mundësia që stuhi afatshkurtra të ketë edhe në zonat bregdetare.
Mot jo -stabil do vazhdojë edhe gjatë mesit dhe fundit të javes, kur priten alternime mes vranësirave, intervaleve kohore me diell dhe rrebesheve të shiut. Normalisht, do të ketë intervale të gjata kohore pa reshje, por reshje rikthehen në çdo moment në ndonjë rajon.
Edhe për fundjavë na pret mot jo-stabil, madje ka disa gjasa për reshje edhe më mëdha ditët e fundjavës si rënie të temperaturave. Reshjet dhe rrebeshet e shiut do të jenë shumë të mirëseardhura dhe do të zbusin thatësinë esktreme në disa rajone. Mbetet të shihet nëse do të ketë ndonjë ndryshim, por përgadituni për një javë jo-stabile dhe me mot mjaft të ndryshueshëm./MeteoBallkan
