Qershori filloi mjaft i ngrohtë dhe me shumë zagushi për shkak të nxehtësisë dhe masave shumë jo-stabile afër viseve tona. Vende-vende pati stuhi të izoluara shiu me vetëtima dhe bubullimë, por në shumë rajone nuk pati fare reshje ngase qelizat kryesore të stuhive ishin në territorin e fqinjit tonë verior.
Megjithatë, masat ajrore jo-stabile do të vazhdojnë të përparojnë drejt viseve tona gjatë ditëve të javës me reshje të herëpashershme dhe stuhi lokale pranverore. Nuk do të mungojnë intervalet e gjata kohore me diell, ndërsa në aspektin termik më freskët do të jetë dita e Enjte.
E Marta pritet të karakterizohet me mot jo-stabil, me intervale kohore me diell dhe vranësira të shpeshta që do të shoqërohen me reshje të kohëpaskohshme shiu vende-vende në formë të rrebesheve lokale. Pasditja vijon me zhvillime konvektive me rrebeshe lokale shiu me vetëtima dhe bubullimë.
Në Shqipëri kryesisht me diell gjatë tërë ditës të martën ndërsa të mërkurën me rrebeshe të izoluara.
Të mërkurën në Kosovë priten periudha të gjata me diell dhe stuhi të izoluara në disa zona periferike të vendit. Stuhi të izoluara priten edhe në pjesë të Maqedonisë së Veriut, Luginës së Preshevës dhe veri të Malit të Zi, ndërkohë që stuhi mjaft të fuqishme do të përfshijnë Ballkanin verior e veriperëndimot nga një sistem mjaft i fuqishëm ciklonik që në mbrëmje mund të prekë edhe pjesë të Shqipërisë dhe ndoshta edhe Kosovën ditën e Enjte.
E Enjta sjellë rrebeshe në të gjitha viset, vende-vende mjaft intensive që nga Shqipëria, pastaj në Kosovë, Maqedoninë Veriore, Mal të Zi dhe Luginë të Preshevës. Temperaturat do të shënojnë ulje ndërsa në pjesë të Shqipërisë mund të ketë vërshime të shpejta.
Mot më stabil pritet të mbajë ditën e Premte edhe pse jo aq nxehtë, ndërsa për fundjavë pritet të kemi edhe periudha me diell edhe vranësira e mundësi për rrebeshe lokale shiu me vetëtima dhe bubullimë.
Sipas parashikimeve aktuale më jo-stabile pritet të jetë dita e shtunë, me mundësi për rrebeshe lokale sidomos në shumë rajone të Kosovës, ndërsa e diela më e qetë. Shqipëria me mot deri diku më stabil përpos ditës së Enjte kur priten stuhi dhe rrebeshe mjaft intensive në shumë pjesë të vendit.
Në aspektin termik temperaturat do të zbresin ditën e enjte për të filluar të ngriten të premten në mënyrë graduale.
Pra, edhe një javë tipike pranverore, me periudha me diell dhe vranësira të shpeshta e stuhi lokale. Në Shqipëri reshjet do të jenë më të rralla, por kur ndodhin pritet të jenë të fuqishme ditën e enjte. Në viset kontinentale rrebeshe më të shpeshta lokale gjatë javës.
Ishte ky parashikim javor i motit me mundësi për ndryshime të vogla në parashikim. Për çdo ndryshim eventual do të njoftoheni me kohë në postimet tona të përditshme në mbrëmje dhe në mëngjes./MeteoBallkan
