Qe nga sot jemi nën ndikimin e një mase masive ajrore anticiklonike që vjen nga jugperëndimi i Evropës, Mesdheu perëndimor dhe Afrika veriore, rajone të përfshira nga ky anticiklon i cili garanton mot stabil dhe relativisht të ngrohtë.
Anticikloni masiv dominon që nga Franca në perëndim, pastaj Spanja dhe Portugalia në jugperëndim, tutje më në jug në Maroku dhe Algjeria në Afrikën veriore e veriperëndimore si dhe Italinë e Ballkanin në viset tona.
Ky anticiklon megjithatë nuk do të zgjasë shumë sepse parashihet të dobësohet të Enjten. Pra, që nga sot e deri të Enjten në të gjitha viset tona na pret mot i qetë dhe stabil me shumë rreze diellore dhe kryesisht pa vranësira, por në disa zona do të ketë kushte për krijime të mjegullnajave dhe kjo mund të pengojë motin e mirë që parashihet. Mjegull parashihet të ketë orëve të hershme të mëngjesit nëpër shumë ultësira dhe lugina, ndërsa në disa zona mund të qëndrojë edhe orëve të paradites. Aty ku eventualisht do të ketë mjegull do të jetë dukshëm më ftohtë se viseve tjera pa mjegull. Temperaturat në përgjithësi do të lëvizin nga -3 deri në 12 gradë Celsius.
Ndryshim i motit pritet të ndodhë të premten me ardhjen e një fronti të ftohtë nga Alpet në veri të Italisë ku do të krijohet një ciklon në Detin Adriatik duke rrugëtuar në drejtim të Greqisë. Fillimisht priten reshje shiu, pastaj edhe reshje lokale shqote e bore. Në Shqipëri prapë priten rrebeshe lokale më intensive, por kësaj radhe reshje priten në gati të gjitha viset tona.
Fundjava sjellë ulje të temperaturave dhe do të vazhdojnë reshje të herëpashershme bore në disa zona të Republikës së Kosovës dhe zonat kodrinore-malore të rajonit, sidomos në lindje të Shqipërisë dhe veçanërisht në malet e Maqedonisë së Veriut. Ka gjasa që reshje lokale bore të ketë edhe në zona më të ulëta mbidetare sidomos në veriperëndim, perëndim dhe jugperëndim të Maqedonisë së Veriut.
Kosovë sigurisht përfiton fjolla bore edhe në zona të ulëta, por për sasinë e reshjeve është herët të flitet detajisht.
Pra, deri të Enjten mot me diell, ngrica në mëngjes dhe mjegull në disa lokacione të ulëta.. Të enjten shtim i vranësirave, të premten ulje e temperaturave e reshje shiu e bore. Fundjava e ftohtë me reshje të herë pas hershme, lokale bore./MeteoBallkan
