Pas disa ditëve mjaft të nxehta sot më në fund moti u freskua në shumë pjesë të rajonit tonë si dhe pati edhe rrebeshe lokalisht të fuqishme shiu me vetëtima dhe bubullimë. Këtë destabilizim të motit e shkaktojë cikloni sekondar i cili u krijua në Italinë veriore dhe po lëvizë në drejtim të Evropës juglindore. Edhe gjatë ditës së nesërme do të jemi nën ndikimin e këtij cikloni i cili do të shkaktojë reshje të reja shiu, vende-vende edhe rrebeshe shiu me vetëtima dhe bubullimë. Më së paku reshje priten në disa pjesë të Maqedonisë dhe në jug të Shqipërisë.
Cikloni do të dobësohet nga dita e martë, kur do të fillojë ngritja e sërishme e temperaturave dhe stabilizimi i motit. Megjithatë edhe të martën në disa pjesë të Kosovës dhe Shqipërisë mund të ketë rrebeshe të izoluara shiu me vetëtima dhe bubullimë. Bregdeti do të qetësohet nga e marta dhe pritet përmirësimi i motit atje.
Nga e mërkura masat jostabile ajrore do të dobësohen edhe më shumë dhe përveç ndonjë rrebeshi të izoluar kryesisht në viset kodrinore-malore, në shumicën e territorit të rajonit tonë do të kemi mot me diell dhe të nxehtë.
Mot kryesisht me diell dhe i nxehtë do të vazhdojë edhe të enjtën, të premtën dhe për fundjavë. Temperaturat maksimale përsëri do të tejkalojnë 30 gradë celsius, në Kosovë pritet të arrijnë deri në 34-35 gradë celsius në nivel vendi, ndërsa në Shqipëri deri në 37 gradë celsius. Edhe pse pritet mot i nxehtë dhe me diell, në disa rajone gjithnjë do të ketë gjasa për rrebeshe të izoluara shiu me vetëtima dhe bubullimë.
Ishte ky parashikimi i motit sipas për javën që po hymë bazuar në ecuritë më të fundit sinoptike dhe për çdo ndryshim eventual do të njoftoheni me kohë në postimet tona të përditshme./Meteoballkan
