Java që kemi hyrë do të karakterizohet me mot jashtëzakonisht të ndryshueshëm, me nxehtësi ekstreme tri ditët e para të javës, dhe ftohje ekstreme tri ditët e fundit të javës.
Me fjalën “ekstrem” këtu nuk nënkuptojmë se do kemi diçka të jashtëzakonshme, por duke pas para sysh se jemi në muajin Shkurt dhe do kemi ndryshime të mëdha motit po e përdorim këtë fjalë.
Sidoqoftë gjatë kësaj jave nuk do të mungojnë as reshjet atmosferike, tri ditët e para në formë shiu me erëra jugore dhe rrebeshe lokale me vetëtima dhe bubullimë, ndërsa ditën e katërt të javës e enjte-premte me depërtimin e ajrit mjaft të ftohtë kontinentale nga verilindja do të ketë edhe reshje dëbore e pastaj acar i thatë por i fortë.
Gjatë kësaj jave do të jenë prezentë edhe erërat e fuqishme në disa rajone, tri ditët e para të ngrohta nga jugu dhe jugperëndimi e pastaj të akullta nga veriu.
Pasi që na pret një mot jashtëzakonisht dinamik gjatë kësaj jave do të mundohemi të jemi sa më aktiv sepse edhe ndryshimet në ecuritë sinoptike do të jenë të mundshme për shkak të dinamikës së fuqishme të atmosferës dhe për çdo ndryshim eventual do ju njoftojmë me kohë në postimet tona të përditshme.
Po ashtu edhe për detaje rreth goditjes së fuqishme polare do të japim gjatë javës kur saktësia do të jetë më e lartë./Meteoballkan
