Bazuar në ecuritë aktuale sinoptike gjatë javes së re na pret mot mjaft i nxehtë dhe me diell, por nuk do të mungojnë vranësirat e herëpashershme të cilat mund të kushtëzojnë ndonjë rrebesh ose stuhi të izoluar me bubullima.
Gjatë tërë javes pritet të jemi nën ndikimin e masave mjaft të nxehta ajrore me origjinë nga Afrika Veriore, por njëkohësisht pritet të kemi depërtimin e masave jo-stabile ajrore nga kontinenti të cilat do të kushtëzojnë destabilizime afatshkurtra në viset tona kontinentale. Në bregdet gjatë tërë javes pritet mot stabil dhe mjaft i nxehtë veror. Rrallëherë mund të ndodhë ndonjë rrebesh në ndonjë zonë bregdetare.
Krahas rritjes së temperaturave rrebeshe të izoluara pasditeve priten kryesisht të martën, të enjten dhe të premten. Rrebeshet e shiut nuk do të jenë gjithëpërfshirëse, por vetëm në zona të caktuara ku nganjëherë mund të ndodhë edhe ndonjë shtrëngatë afatshkurtër. Më shumë predispozita për rrebeshe shiu kanë viset kodrinore-malore.
Temperaturat maksimale pritet të arrijnë deri në 35 ose 36 gradë Celsius në Kosovë, ndërsa në Shqipëri dhe Maqedoninë Veriore ato mund të arrijnë deri në 39 ose 40 gradë Celsius në zonat e nxehta. Më së nxehti pritet të jetë dita e enjte dhe e premte, por me mundësi për freski me rrebeshe dhe bubullima në disa zona të Kosoves.
Edhe e shtuna pritet të jetë mjaft e nxehtë, ndërsa bazuar në ecuritë aktuale freskim i motit pritet afërsisht rreth fundit të dites së shtunë dhe të dielen.
Pasiqë parashikimi është afatgjatë dhe për shkak të dinamikes së atmosferës ndryshime (të vogla) në parashikim mund të ndodhin dhe nëse ka ndonjë ndryshim eventual do ju lajmërojmë në postimet tona të përditshme në MeteoBallkan./MeteoBallkan