Masa ajrore ciklonike nga Atlantiku dhe Mesdheu do të ndikojnë edhe këtë javë në kushtet e motit në territoret tona, megjithatë nuk do të ketë reshje intensive.
Fillimi i javës siç po e shohim me mot të thatë dhe të ftohtë, megjithatë vranësirat do të vijnë nga Mesdheu duke filluar nga e marta duke kushtëzuar fillimisht reshje sporadike shiu e ndonjë fjollë bore në viset kodrinore-malore. Pak më shumë reshje shiu priten në Shqipëri, ndërsa temperaturat shënojnë rritje të lehta për shkak të rrymimeve ajrore nga jugu.
Edhe më vranët dhe me reshje të herëpashershme shiu pritet të jetë të mërkurën, ndërsa erërat nga jugu vazhdojnë të dobëta.
Të Enjten plotësisht vranët dhe me ndryshimin e drejtimit të erërave do të pasojë ulja e temperaturave. Për këtë arsye në shumë vise të Republikës së Kosovës do të fillojnë reshjet e borës, ngase ende do të jemi nën ndikimin e mases ciklonike ajrore e cila tani ka depërtuar thellë në juglindje të Evropes. Reshje bore priten në gati të gjitha viset kodrinore-malore të rajonit, por edhe në disa ultësira të Republikës së Kosovës, por sipas ecurive aktuale bora nuk do të jetë e qëndrueshme dhe nuk priten akumulime nëpër ultësira.
Të premten na pret mot i ftohtë, me reshje sporadike shiu e bore të cilat do të pushojnë, ngase do të pasojë ardhja e masave pak më të thata ajrore anticiklonike. Nata dhe mëngjesi me acar, por jo shumë të fortë, ndërsa temperaturat ditore rreth 5 gradë Celsius.
Në përgjithësi edhe një javë me vranësira të shumta dhe reshje të herëpashershme, por kryesisht të dobëta. Të mërkurën shi e të enjten edhe borë. Të mërkurën jugu e të enjten veriu. Gjatë javës në Kosovë temperaturat do të jenë rreth vlerave normale për këtë periudhë kohore ku ajo minimalja do të ulet afërisht deri në -5 gradë Celsius, ndërsa maksimalja rreth 9 gradë Celsius.
Më ngrohtë do të jetë në mesdheun shqiptar.
Në fundjavë do të vazhdojë mot i ngjashëm, me vranësira e ndonjë intervale kohor me diell, ndërkohë që reshje të reja kalimtare mund të kemi të dielen./MeteoBallkan
