Vetëm edhe sot dhe nesër pritet të jemi nën ndikimin e masave ajrore të ngrohta nga Mesdheu, ndërsa nga e mërkura një valë e re e të ftohtit polar do të përfshijë Ballkanin, por kjo valë e të ftohtit nuk pritet të jetë e fuqishme sikur ajo e kaluara.
Gati gjatë tërë javës pritet të jemi nën ndikim e masave ajrore të paqëndrueshme ciklonike, ndërsa në Atlantik, Britani, Rusi dhe Skandinavi kemi ekspansion të fuqishëm anticiklonik dhe pikërisht kjo gjendje sinoptike favorizon mot të paqëndrueshëm dhe të ftohtë në rajonin tonë.
Sot pritet mot i ngrohtë, ndërsa nesër ulje të lehta të temperaturave si dhe riga lokale shiu. Në disa rajone priten edhe rrebeshe shiu me vetëtima dhe bubullimë, sidomos në viset mesdhetare/bregdetare.
Të mërkurën ulje e temperaturave dhe erëra veriore. Priten edhe reshje shiu të cilat në viset kodrinore-malore pritet të shndërrohen në reshje bore. Nganjëherë fjolla dëbore priten edhe në disa ultësira të Kosovës sidomos ka gjasa në mëngjes dhe gjatë orëve të natës.
Nga e enjta relativisht ftohtë, me ndonjë interval kohor me diell dhe ndonjë rigë lokale shiu ose rrebeshe bore në viset kodrinore/malore.
Të premtën sipas të gjitha gjasave përmirësim afatshkurtër i motit, ndërsa për fundjavë priten vranësira të reja të dendura të cilat pritet të sjellin reshje shiu. Nê viset kodrinore-malore reshje bore./Meteoballkan
