Kjo javë u karakterizua me uljen e ndjeshme të temperaturave në fillim të javës për shkak të ardhjes së frontit të fuqishëm të ftohtë ajror. Fronti solli edhe vranësira dhe reshje lokale shiu ku lokalisht pati edhe rrebeshe lokale shiu me vetëtima dhe bubullimë, megjithatë territoret tona nuk u përfshinë nga shira të mëdha siç po ndodhë në Greqi.
Cikloni i formuar në territorin grek dhe Mesdheun jugor do të vazhdojë të ndikojë edhe dy ditë të javës në rajonin tonë, por në territoret tona nuk priten shira të mëdha. Reshje paksa më intensive priten në jug- juglindje të Shqipërisë dhe jug-qendër të Maqedonisë së Veriut. Reshje më të pakta do të arrijnë në territorin e Republikës së Kosovës.
Sa më afër fundit të javës aq më shumë zbehet ndikimi ciklonik dhe fuqizohet ndikimi anticiklonik. Me ndikim anticiklonik nënkuptojmë përmirësim dhe stabilizim gradual të motit dhe kjo do të ndodhë sidomos në fundjavë kur na pret mot kryesisht me diell dhe stabil. Temperaturat do të shënojnë rritje dhe në zonat më të nxehta të Shqipërisë ato mund të shkojnë përsëri deri në 30 gradë Celsius, madje edhe ndonjë shkallë më lartë. Në Kosovë deri afër 30, por mund të ndodhë edhe 30 gradë Celsius.
Ishte ky parashikimi i motit për ditët e mbetura të javës së parë të Shtatorit ku presim reshje sporadike deri në fundjavë. Reshje më të theksuara në Maqedoni dhe jug e juglindje të Shqipërisë. Në fundjavë përmirësim dhe stabilizim i motit në tërë rajonin. Po ashtu edhe temperaturat shënojnë rritje./METEOBALLKAN
