Po afrohet fundi i dimrit klimatologjik dhe temperaturat po vijnë duke u rritur. Ky dimër do të mbahet mend si një ndër dimrat më të ngrohtë të të gjitha kohërave në rajonin tonë dhe po ashtu për mungesën totale të borës nëpër viset e ulëta.
Masa të fuqishme anticiklonike po mbretërojnë në Mesdhe dhe rajonin tonë duke kushtëzuar mot krejtësisht stabil dhe relativisht të ngrohtë. Fronti i dobët i ditës së sotme u ndje shumë pak në shumë rajone.
Nga nesër (e martë) do të kemi stabilizim të plotë të motit dhe rritje të mëtutjeshme të temperaturave. Nën rrezet diellore do të kemi ditë të ngrohta pranverore.
Me kalimin e ditëve të javës do të vazhdojë moti i ngrohtë pranveror, ndërsa parashihen vranësira të herëpashershme kalimtare. Afër fundjavës pritet të kemi fuqizim në parametrin e erërave dhe lokalisht mund të ketë edhe riga shiu.
Temperaturat minimale gjatë kësaj jave mund të sbresin ndonjë natë deri në -2 gradë Celsius në zonat kontinentale, ndërsa ato maksimale pritet të jenë pranverore, nga 15 deri në 19 gradë Celsius në zonat kontinentale. Mund të ndodhë që të kemi edhe shifrën 20 në disa vise që zakonisht janë më të ngrohta, ndërsa viset mesdhetare gjatë kësaj jave do të kenë temperatura deri në 20 gradë Celsius, madje edhe më ngrohtë.
Ishte ky parashikimi javor i motit dhe ndryshime të vogla mund të ndodhin. Për çdo ndryshikm eventual do të njoftoheni në postimet tona të përditshme./MeteoBallkan