Edhe një javë me mot mjaft të ndryshueshëm na pret këtë Dhjetor dhe reshjet atmosferike nuk do të jenë të mëdha dhe nuk do të kapin gjithë territorin. Pra, kemi të bëjmë me reshje të karakterit lokal gjatë kësaj jave.
Cikloni i vendosur në Itali ose aty diku në Mesdhe do të ndikojë edhe disa ditë kushtet sinoptike në viset tona, por nuk priten reshje të mëdha. Ky ciklon nuk po sjellë lagështi të madhe në viset tona dhe nuk pritet të sjellë. Reshjet më intensive gjatë kësaj jave prite në viset bregdetare të Shqipërisë dhe Malit të Zi. Në kontinent apo tokë reshjet do të jenë të pakta dhe të izoluara. Edhe në Kosovë nuk priten reshje të mëdha.
Do të kemi një përzierje reshjesh shiu ,shqote e bore, por të gjitha do të jenë të karakterit lokal ngase e tillë është natyra e këtij cikloni. Në bregdet shiu i shpeshtë, ndërsa në malet e larta borë. Në viset tjera reshje më të rralla.
Fillimisht do të kemi erëra paksa më të ngrohta nga jugu, ndërsa nga e marta do të fillojnë erëra të dobëta, pak më të ftohta nga veriu. Këto erëra do të fuqizohen pak në mesjavë për shkak të një fronti të dobët, të ftohtë ajror.
Ky front edhe mund të sjellë reshje paksa më intensive dhe mundësi edhe për reshje lokale bore në mes të javës, megjithatë në përgjithësi nuk priten reshje të mëdha, edhe pse lokalisht mund të ketë ndonjë rrebesh të fuqishëm shiu e bore.
Cikloni Mesdhetar humb ndikimin e tij me afrimin e fundjavës dhe në vend të tij vjen një masë e fuqishme ajrore anticiklonike nga Kontinenti, por në fundjavë mund të kemi ardhjen e një sistemi tjetër nga Mesdheu me reshje shiu e bore. Intensiteti i këtyre reshjeve mund të jetë pak më i madh.
Pra, për fund edhe një javë me mot të ndryshueshëm dhe pa ndonjë ekstrem. Temperaturat rreth vlerave mesatare-normale për këtë periudhë kohore. Reshjet nuk do të mungojnë dhe do të jenë të karakterit lokal, më intensive në disa vise të Shqipërisë. Nuk do të mungojnë as intervalet kohore me diell. Në mesjavë ulje e temperaturave, por jo e theksuar, ndërsa në fundjavë reshje të reja shiu e mundësi edhe për borë./MeteoBallkan
