Pas frontit të ftohtë i cili solli reshje dhe rrebeshe shiu kushtet e motit pritet të përmirësohen me fillimin e javës së re, edhe pse fronti kushtëzoi uljen e temperaturave dhe kjo do të ndjehet sidomos gjatë natës dhe mëngjesit të hershëm.
Ulja e temperaturave në viset kontinentale do të jetë afatshkurtër, ngase gjatë javës priten rritje të ndjeshme të temperaturave ditore, por netët dhe mëngjeset mbesin të freskëta.
Në viset bregdetare kjo javë do të karakterizohet me mot mjaft të favorshëm për pushime sidomos ditët e punës, ngase me ardhjen e fundjavës shumë vise bregdetare do të përfshihen nga vranësira dhe rrebeshe shiu si dhe ulje të temperaturave. Ngjashëm pritet të jetë edhe për viset tona kontinentale, pra afërsisht deri ditën e shtunën na pret mot me diell dhe nganjëherë me disa vranësira, por nxehtë dhe pa reshje atmosferike. Riga kryesisht të dobëta mund të ketë të hënën në disa vise të Kosovës.
Temperaturat gjatë mesit të javës parashihet të shënojnë rritje të ndjeshme si në bregdet po ashtu edhe në viset kontinentale dhe ato maksimale pritet të arrijnë deri në 30 gradë Celsius, ndërsa në viset mesdhetare edhe disa gradë më lartë.
Reshje atmosferike nuk pritet të ketë afërsisht deri të shtunën bazuar në ecuritë aktuale sinoptike.
Të shtunën fillojnë të vijnë frontet e ftohta ciklonike të cilat pritet të jenë potente dhe të shkaktojnë ulje të ndjeshme të temperaturave, ndërsa parashihet edhe krijimi i ndonjë ciklogjeneze në Mesdhe që mund të sjellë edhe reshje të dendura atmosferike. Reshjet atmosferike nga fundjava priten si në viset kontinentale po ashtu edhe në viset mesdhetare, por detaje për këtë duhet pritur ngase në pyetje janë shumë ditë.
Pra, gjatë kësaj jave na pret mot i nxehtë sidomos në mesjavë, me diell dhe nganjëherë me shtrirje të vranësirave, por pa reshje atmosferike. Gjatë fundjavës pritet ndryshim substancial i kushteve të motit, me shtim të vranësirave me reshjeve të dendura lokale dhe ulje të ndjeshme të temperaturave./MeteoBallkan
