Vera iku përfundimisht dhe temperaturat u ulën pas nxehtësisë së madhe e cila zgjati më shumë se tre muaj. Edhe situata hidrologjike u përmirësua dukshëm pas reshjeve intensive të ditëve të kaluara, prandaj punët bujqësore vjeshtore mund të kryhen në mënyrën më të mirë, megjithatë duhet pritur tharja e tokës e cila mund të vonojë nëse reshjet eventuale përsëriten.
Pas reshjeve të dendura të së dielës atmosfera është qetësuar dhe sot (e Hënë) kemi intervale kohore me diell. Temperaturat po fillojnë të rriten, ndërsa gjatë ditës nuk pritet ndonjë ndryshim i motit. Pra, vazhdojnë alternimet mes vranësirave e intervaleve kohore me diell, ndërsa mund të ketë edhe ndonjë reshje afatshkurtër, lokale shiu në disa rajone të caktuara.
Përkundër pushimit të reshjeve mbi territoret tona po vazhdojnë të qarkullojnë masat ajrore ciklonike, prandaj reshjet e shiut pritet të vijnë apo paraqiten prapë herë pas here gjatë kësaj jave. Mesdheu pritet të jetë mjaft aktiv me masa ajrore ciklonike dhe për këtë arsye priten vranësira të shpeshta nga Mesdheu që vijnë në Shqipëri, pastaj edhe Kosovë dhe Maqedoninë Veriore. Edhe pse temperaturat do të shënojnë rritje të lehta, shpeshherë presim vranësira të dendura me reshje të herëpashershme shiu e nganjëherë priten edhe rrebeshe lokale shiu me vetëtima dhe bubullimë.
Gjatë tërë javës pothuajse çdo ditë priten reshje lokale shiu, të herëpashershme. Më shumë reshje shiu priten orëve të pasdites dhe mbrëmjes sidomos të mërkurën dhe të enjten dhe të Premten. Reshjet të shpeshta priten në bregdet në formë të rrebesheve të shiut me vetëtima dhe bubullimë.
Pra, para nesh një javë me mot mjaft të ndryshueshëm, me intervale të shpeshta kohore me diell, por edhe vranësira të shpeshta e reshje-rrebeshe lokale shiu. Reshjet nuk do të jenë gjithëpërfshirëse, por prezente në shumë rajone sidomos orëve të pasdites dhe mbrëmjes.
Më së shumti reshje priten të Mërkurën, Enjten dhe të Premten,. Njëkohësisht temperaturat shënojnë rritje të lehta sepse mes reshjeve parashihen intervale të shpeshta kohore me diell. Maksimalet në Kosovë nga 20 deri në 24 gradë Celsius, kurse në Shqipëri deri në 26 apo 27 gradë Celsius. Këto vlera maksimale të temperaturave do të pengohen shpeshherë nga vranësirat e rrebeshet e shiut.
Këto ishin disa informata për motin gjatë kësaj jave. Ndryshime kryesisht të vogla gjithsesi se mund të ketë. Për çdo ndryshim eventual do të njoftoheni me kohë në postimet tona të përditshme e sidomos në Rubrikën “Moti nesër dhe ditëve në vazhdim” që e postojmë çdo mbrëmje vonë dhe mëngjes herët./MeteoBallkan
