Fillimi i javës do të jetë krejtësisht i thatë, nën ndikimin e anticiklonit masiv na presin netë të kthjellëta dhe po ashtu edhe ditë me diell. Temperaturat do të shënojnë rritje ditë për ditë, ndërsa problematike mund të jetë vetëm mjegulla në disa lugina dhe ultësira të vendit e cila mund të qëndrojë më gjatë.
Temperaturat do të shënojnë rritje progresive, ngase masat ajrore vijnë nga jugperëndimi i ngrohtë i Evropës.
Përderisa i afrohemi mesit të javës fillojnë të shfaqen vranësira kalimtare, ndërsa të enjten mund të ketë reshje krejtësisht të dobëta në disa zona, ngase këtu fillon edhe dobësimi i anticiklonit në viset tona.
Në këtë periudhë në Skandinavi dhe shtetet e Baltikut do të kalojnë masa të fuqishme ajrore ciklonike që vijnë nga Atlantiku, ndërsa anticikloni i Azoreve tërhiqet në perëndim të Mesdheut. Si pasojë do të kemi ndeshjen e këtyre masave gjigande ajrore në viset tona, prandaj parashihen vranësime kalimtare dhe reshje kalimtare, por rrymimet ajrore do të mbesin të ngrohta nga Mesdheu dhe depërtimet e ajrit të ftohtë polar do të jenë krejtësisht afatshkurtra. Pra, pritet të kemi reshje të herëpashershme shiu e që shkurtimisht mund të shndërrohen në borë. E kemi fjalën për fundin e kësaj dhe fillimin e javës së re.
Sa më shumë që afrohen festat e fund-vitit aq më pak janë gjasat për ndonjë skenar magjik dimëror dhe kjo është bërë traditë viteve të fundit, megjithatë ende mbesin disa shpresa për ndonjë ndryshim eventual të gjendjes sinoptike që do të mund të në fund të vitit që do të mund të kushtëzonte reshje të dendura bore.
Shikuar në përgjithësi vështirë që mund të ndodhë ndonjë skenar dimëror, ngase kemi Atlantikun super aktiv dhe erërat zonale perëndimore që janë “armiku” kryesor i dimrit në viset tona po ashtu super aktive, megjithatë shumë ditë janë në lojë dhe mbetet vetëm të shpresojmë për ndonjë ndryshim në ecuritë sinoptike.
Pra, këtë javë deri të enjten mot stabil dhe i ngrohtë për këtë periudhë kohore. Në disa zona me mjegull.Aty ku ka mjegull do të jetë më ftohtë. Të enjten vazhdon moti kryesisht stabil, por me vranësira lokale e reshje të pakta. Reshje paksa më intensive kalimtare mund të kemi të premten ose për fundjavë dhe priten reshje shiu e pastaj edhe reshje kalimtare bore në disa zona. Temperaturat shënojnë rritje gjatë javës dhe në fundjavë mund të pësojnë ulje afatshkurtra por rriten menjëherë.
Ishte ky parashikimi javor i motit. Ndryshime të vogla në parashikim mund të ketë. Për çdo ndryshim eventual do të njoftoheni në postimet tona të përditshme./MeteoBallkan
