Reshjet e borës kanë filluar në shumë pjesë të Republikës së Kosovës dhe do të vazhdojnë gjatë natës, por nuk do të zgjasin shumë.
Nesër në Kosovë do të mbajë mot plotësisht i vranët. Paradite kryesisht i thatë, ndërsa pasdite ose në mbrëmje me reshje bore. Vende-vende, herë pas here priten reshje intensive bore. Në skajin jugor dhe juglindor të Kosovës mund të ketë përzierje me shi për shkak të afërsisë së temperaturave jo shumë të ftohta.
Në Shqipëri, Maqedoninë Veriore dhe Mal të Zi nesër paradite kryesisht thatë dhe vranët, ndërsa pasdite me rigjenerim të reshjeve të shiut.
Të dielën dhe të hënën sipas ecurive aktuale Kosova do të jetë fushëbetejë mes temperaturave polare dhe atyre mesdhetare. Priten reshje shiu, shqote, bore, shiu të akullt varësisht nga vendi dhe pozita gjeografike. Më shumë gjasa për shi do të ketë në jug dhe lindje, ndërsa borë në viset tjera. Reshjet do të jenë intensive herë pas here të cilat mund të përkeqësojnë gjendjen edhe ashtu të rënduar nga vërshimet.
Në Shqipëri dhe Maqedoninë Veriore të dielën vranët dhe me reshje intensive shiu. Gjatë ditës reshjet pritet të pushojnë në jug, por do të vazhdojnë në veri me intensitet të larte.
Mot i vranët dhe me reshje do të vazhdojë edhe të hënën me tendencë të uljes së intensitetit të reshjeve./Meteoballkan