Nesër në Kosovë do të mbajë mot i ftohtë, me vranësira, mundësi për ndonjë interval të shkurtër kohor me diell dhe fjolla sporadike bore. Temperaturat do të shënojnë ulje për shkak të erërave të ftohta veriore.
Në Shqipëri sonte reshje bore në jug dhe juglindje të vendit, herë pas here dhe vende-vende intensive. Në bregdetin jugor kryesisht riga shiu. Nesër në Shqipëri do të mbajë mot i ftohtë dhe me intervale kohore me diell. Vetëm në juglindje paradite ende me reshje bore.
Edhe në jug, jugperëndim dhe juglindje të Maqedonisë së Veriut sonte me reshje bore, vende-vende dhe herë pas here intensive. Në viset tjera kryesisht thatë me fjolla sporadike bore. Nesër në mëngjes do të vazhdojnë reshjet e borës në rajonet e lartpërmendura për tu ndërprerë gjatë orëve të paraditës. Gjatë ditës pritet mot kryesisht i vranët dhe i ftohtë. Në Mal të Zi nesër pritet të mbajë mot kryesisht i thatë dhe mjaft i ftohtë.
Të dielën në Kosovë do të vazhdojnë alternimet mes vranësirave dhe intervaleve kohore diellore, por do të jetë shumë ftohtë dhe me erëra veriore. Pasdite dhe në mbrëmje pritet të ketë shtim të vranësirave dhe reshje bore vende-vende. Natën mes së dieles dhe së hënës në veri të Shqipërisë priten reshje bore, duke përfshirë edhe bregdetin verior. Ka shumë gjasa që fjollat e borës të arrijnë deri në Tiranë.
Nga e hëna na pret mot i ftohtë, me acar të fortë gjatë netëve dhe mëngjeseve dhe me alternime mes vranësirave dhe intervaleve kohore me diell gjatë ditëve, ndërsa nga e mërkura pritet që i ftohti të fillojë të zbutet./Meteoballkan