Modeli ECMWF përsëri na jep shpresë dhe mendojmë se kjo është edhe ajo çka me të vërtetë do të ndodhë ditëve të ardhshme.
Nesër fillimisht në jug të Shqipërisë do të kemi riga lokale shiu kurse në pjesët tjera të tërë rajonit tonë ende do të mbetet thatë, me ulje të mëtutjeshme graduale të temperaturave. Në mbrëmje dhe gjatë natës bora do të fillojë të bjerë në juglindje dhe disa pjesë të lindjes së Shqipërisë dhe në Maqedoninë perëndimore.
Në mbrëmjen e së shtunës borë mund të ketë edhe në Kosovë.
Storja kryesore na vjen të dielën kur mbi Detin Jon pritet të depërtojë një ciklon i fuqishëm i cili do të rrugëtojë me qendrën e tij në drejtim të Greqisë dhe Bullgarisë. Fillimisht në jug të Shqipërisë përsëri priten reshje të dendura shiu dhe bore në lartësi më të larta mbidetare kurse në juglindje dhe lindje si dhe në Maqedoni priten reshje të dendura bore. Pasdite apo në mbrëmje reshjet e borës pritet të përfshijnë edhe Kosovën të cilat me intervale mund të jenë të dendura por jo sikur në Maqedoni . Sipas ecurive aktuale e tërë Maqedonia do të përfshihet nga stuhi dëbore së bashku me lindjen e Shqipërisë. Kjo stuhi e fuqishme dëbore pastaj do të rrugëtojë në drejtim të Bullgarisë dhe Rumanisë ku do të fuqizohet edhe më shumë duke paralizuar këto dy shtete Ballkanike.
Pra gjithnjë e më shumë po shtohen gjasat që edhe Kosova të ketë reshje bore të dielen ngase për Maqedoninë dhe shtetet tjera nuk ka më dyshim.
Më së paku reshje atmosferike do të ketë në Shqipërinë dhe Kosovën veriperëndimore.
Të Martën na pret një ciklon i ri por kësaj radhe me reshje shiu në viset e ulëta dhe reshje bore në viset malore. Ky ciklon do të përfshijë tërë Shqipërinë, Kosovën dhe Maqedoninë.
Të shpresojmë që nesër mos të na zhgënjejë edhe modeli ECMWF por tekefundit është tjetër kush që i ka në dorë këto punë./Meteoballkan.
