Sonte gjatë orëve të natës në lindje dhe verilindje të Maqedonisë së Veriut mund të ketë rrebeshe lokalisht të fuqishme shiu me vetëtima dhe bubullimë. Disa nga këto rrebeshe mund të “kalojnë” edhe kufirin me Kosovën dhe të kushëzojnë ndonjë rrebesh lokal shiu me vetëtima dhe bubullimë thellë në juglindje dhe lindje të Kosovës. Ndonjë rrebesh i izoluar mund të zhvillohet edhe në ndonjë rajon tjetër, por pjesa dërmuese e territoreve tona do mbetet pa reshje sonte.
Nesër në Kosovë pritet mot mjaft i ndryshueshëm dhe jo-stabil. Paradite dhe gjatë ditës mund të ketë intervale kohore me diell dhe zagushi, ndërsa pasdite priten zhvillime të fuqishme vranësirash të cilat pritet të kushtëzojnë rrebeshe lokale shiu me vetëtima dhe bubullimë. Vende-vende mund të ketë rrebeshe të fuqishme shiu dhe mundësi edhe për breshër. Më së paku reshje priten në disa vise në jug dhe perëndim të Kosovës.
Rrebeshe të fuqishme shiu nesër priten edhe në shumë vise të Maqedonisë së Veriut dhe Luginës së Preshevës, ndërsa në Shqipëri dhe jugun e Malit të Zi nesër pritet mot kryesisht me diell, vranësira, pa reshje dhe relativisht i ngrohtë.
Të premtën na pret mot i freskët, me intervale kohore me diell dhe zhvillime të shpeshta të vranësirave të cilat pritet të na sjellin reshje të herëpashershme shiu si dhe rrebeshe lokale shiu me vetëtima dhe bubullimë. Rrebeshet e shiut pritet të përfshijnë edhe veriun dhe verilindjen e Shqipërisë. Në jug mot me diell dhe pa reshje.
Të shtunën dhe të dielën pritet të kemi përmirësim të përkohshëm të motit, por nuk pritet të jetë shumë nxehtë.
Nga e diela pasdite vonë ose në mbrëmje priten vranësira të reja me reshje të reja lokale shiu./Meteoballkan