Nesër në Kosovë do të mbajë mot plotësisht i vranët dhe me reshje shiu. Reshje më intensive priten sonte gjatë natës dhe orëve të mëngjesit. Gjatë ditës së nesërme reshjet do të bien në intensitet, por do të vazhdojnë ende herë pas here. Në viset kodrinore-malore do të fillojnë reshjet e bores. Temperatura maksimale pritet të arrijë deri në 9 gradë Celsius.
Në Shqipëri, Maqedoninë Veriore, Mal të Zi dhe Kosovën lindore nesër pritet të mbajë mot i vranët dhe me reshje lokale shiu. Gjatë ditës në Maqedoninë Veriore do të ketë intervale kohore me diell.
Të martën do të kemi ardhjen e ciklonit të ri me reshje shiu. Pas kthjellimit afatshkurtër, menjëherë do të ketë shtim të vranësirave të cilat do të sjellin reshje të reja shiu, fillimisht në Shqipëri dhe Mal të Zi e pastaj edhe në Kosovë dhe Maqedoninë Veriore. Në Shqipëri, veri- perëndim, perëndim dhe jug të Kosovës pritet valë e re reshjesh intensive. Lokalisht edhe në viset tjera.
Nga e mërkura do të kemi stabilizim gradual të motit dhe reshjet do të jenë vetëm sporadike. Do të kemi intervale kohore me diell dhe Temperaturat pritet të luhaten nga 0 ajo minimale deri në 14 gradë Celsius ajo maksimale. Në viset mesdhetare pak më ngrohtë./MeteoBallkan
