Nesër në Kosovë pritet të kemi mot më të ngrohtë, por jo-stabil. Gjatë ditës priten intervale kohore me diell dhe vranësira lokale. Pasdite priten zhvillime të vranësirave konvektive të cilat pritet të kushtëzojnë rrebeshe lokale shiu me vetëtima, bubullimë dhe mundësi për breshër. Rebeshet nuk do të jenë gjithëpërfshirëse, por vetëm vende-vende. Temperaturat pritet të shënojnë rritje të ndjeshme dhe ajo maksimale pritet të arrijë deri në 21 gradë Celsius.
Në Shqipëri nesër pritet të mbajë mot me vranësira dhe intervale kohore me diell. Pasdite vonë në veri-veriperëndim të vendit priten reshje të dendura shiu dhe rrebeshe lokalisht intensive me vetëtima dhe bubullimë. Ndonjë rrebesh të izoluar mund të ndodhë edhe në qendër dhe lindje të vendit, ndërsa jugu pritet të karakterizohet me intervale kohore me diell dhe ndonjë rigë shiu.
Në Maqedoninë Veriore nesër pritet po ashtu mot më i ngrohtë, me intervale kohore me diell dhe zhvillime të izoluara pasdite me ndonjë rrebesh shiu me vetëtima dhe bubullimë. Rrebeshe mjaft intensive dhe shira të dendura nesër priten në Mal të Zi, ndërsa në Luginën e Preshevës priten intervale kohore me diell dhe riga lokale shiu.
Të shtunën na pret mot i ndryshueshëm, me vranësira, intervale kohore me diell dhe riga lokale shiu, ndërsa nga e diela na pret mot më i nxehtë dhe me më shumë rreze diellore. Rrallë në disa vise pasditeve priten zhvillime të izoluara të vranësirave konvektive që mund të kushtëzojnë ndonjë rrebesh të izoluar shiu me vetëtima dhe bubullimë./MeteoBallkan
