Nesër në rajpnin tonë përsëri do të kemi shtim të vranësirave dhe reshje atmosferike si pasojë e afrimit të ciklonit të ri nga Gjiri i Gjenovës. Sonte gjatë orëve të vona të natës në Bregdetin Shqiptar pritet të fillojnë reshje lokale shiu, të cilat do të intensifikohen nesër herë pas here. Në disa raste priten edhe rrebeshe shiu me vetëtima dhe bubullimë sidomos në jug dhe veriperëndim të Shqipërisë. Në viset malore priten reshje bore.
Reshje atmosferike shi dhe bore nesër gjatë ditës do të përfshijnë edhe rajonin e Dukagjinit në Kosovë. Reshje më të lehta priten në rajonet tjera të Kosovës. Reshjet e borës herë pas here mund të jenë dendura në Dukagjin.
Edhe perëndimi i Maqedonisë nesër vonë do të përfshihet nga reshje të reja atmosferike, nëpër ultësira priten reshje shiu dhe skllote kurse në viset malore mund të ketë reshje bore.
Mot mjaft i ndryshueshëm do të mbajë edhe ditëve të ardhshme me reshje të shpeshta shiu në Shqipëri, reshje të herëpashershme shiu, bore dhe skllote në Kosovë dhe Maqedoni.
Detaje tjera në postimet tona të ardhshme në meteoballkan.com./Meteoballkan
