Atmosfera është destabilizuar ditën e djeshme dhe në shumë rajone të Kosovës pati reshje shiu dhe shtrëngata lokale. Kjo për arsye të depërtimit të masave ajrore të paqëndrueshme nga Atlantiku.
Edhe sot (e Hënë) priten vranësira të dendura të cilat shpeshherë pritet të kushtëzojnë edhe reshje shiu dhe rrebeshe lokalisht të fuqishme shiu me vetëtima dhe bubullimë. Vende-vende mund të ketë rrebeshe mjaft intensive të cilat mund të shkaktojnë përmbytje të shpejta.
Nga e dita e nesërme (e Martë) në Kosovë më shumë intervale kohore me diell, ndërsa priten edhe riga të izoluara shiu në disa rajone, por në përgjithësi pa reshje. Në Shqipëri dhe Maqedonin gjatë ditës së martë priten rrebeshe intensive lokale shiu me vetëtima dhe bubullimë me përjashtim të veriut të Shqipërisë ku reshjet priten të jenë shumë të pakta dhe më të izoluara.
Edhe të mërkurën na presin më shumë intervale kohore me diell dhe po ashtu priten rritje të temperaturave. Për shkak të dendësisë së ajrit pritet të jetë zagushi. Rrebeshe të fuqishme lokale priten në jug të Shqipërisë dhe disa vise të Maqedonisë së Veriut, ndërsa në viset tjera mund të ketë ndonjë rrebesh sporadik.
Edhe ditët e mbetura të javës, pra nga e enjta e tutje moti do të vazhdojë të jetë mjaft jo-stabil. Intervalet kohore me diell dhe zagushinë e ajrit herë pas here ndërpriten nga rreebeshet e fuqishme lokale të shiut me vetëtima dhe bubullimë. Nga e enjta dhe e premta rrebeshet e pasdites dhe mbrëmjes rikthehen edhe në Kosovë, Mal të Zi dhe Luginën e Preshevës. Kjo javë sjellë rrebeshe shiu edhe në bregdetin shqiptar, por kjo nuk do të thotë se nuk do të ketë periudha kohore me diell.
Në fund të theksojmë se përpos ditës së sotme kur priten reshje më gjithëpërfshirëse, gjatë javës reshjet do të jenë më të lokalizuara, pra përderisa një rajon mund të përmbytet nga ndonjë rrebesh eventual i fuqishëm rajoni tjetër mund të mos përfitojë fare reshje.
Në aspektin termik, temperaturat gjatë kësaj jave nuk pritet të pësojnë ndonjë ndryshim dramatik. Në kohën e intervaleve kohore me diell temperaturat rriten, për tu ulur në kohën e rrebesheve dhe shtrëngatave lokale./Meteoballkan
