Tetori na solli reshje të dobishme atmosferike, ndërsa në fund të muajit patëm disa ditë mjaft të këndshme vjeshtore.
Edhe Nëntori premton ditë të mira sidomos gjysma e parë e tij. Siç po e shohim të gjithë sot po mbanë mot relativisht i ngrohtë dhe me diell, përderisa në mbrëmje pritet të ketë shtim të konsiderueshëm të vranësirave.
Reshjet e shiut do të fillojnë gjatë natës në Shqipëri dhe Mal të Zi për tu përhapur gjatë ditës së nesërme në Kosovë dhe Maqedoninë Veriore. Sistemi frontal në kuadër të një cikloni i cili pritet që nga Adriatiku verior të kalojë përmes Kroacisë duke shkaktuar reshje mjaft të fuqishme atje. Ky sistem pritet të përfshijë edhe tërë territoret tona gjatë ditës së nesërme me reshje shiu dhe lokalisht edhe rrebeshe shiu me vetëtima dhe bubullimë.
Reshjet nuk do të zgjasin shumë, prandaj në fund të ditës së nesërme do të pasojë përmirësimi i motit dhe kthjellimi gradual i tij.
Nga e mërkura një tjetër ciklon depërton në Evropë por nuk depërton thellë në Ballkan. Si pasojë do të fillojnë rryma të ngrohta ajrore nga Afrika Veriore dhe Mesdheu mbi rajonin tonë, kështu që temperaturat shënojnë rritje. Priten alternime mes vranësirave dhe intervaleve kohore me diell. Reshje shiu mund të ketë vetëm në Mal të Zi e ndonjëherë edhe në veri të Shqipërisë dhe rrallë në ndonjë rajon të Kosovës. Në përgjithësi na pret mot i thatë nga e mërkura për disa ditë me temperatura maksimale që pritet të arrijnë deri në 20 gradë Celsius, madje edhe më shumë. Gjatë fundjavës një tjetër ciklon me origjinë nga Afrika Veriore pritet të formohet dhe fuqizohet larg në Mesdheun perëndimor, mes Italisë, Francës, Spanjës, Tunizisë dhe Algjerisë. Edhe ky ciklon nuk pritet të sjellë reshje tek ne dhe po ashtu do të favorizojë rrymimet e ngrohta nga jugu në drejtim të rajonit tonë.
Pra, para nesh një javë e ngrohtë për këtë periudhë kohore me reshje shiu të martën e pastaj me alternime mes vranësirave dhe intervaleve kohore me diell. Nëse kemi ndonjë ndryshim në parashikim do të njoftoheni gjatë në postimet tona të përditshme./Meteoballkan
