Gjatë kësaj fundjave na pret mot i ndryshueshëm, me alternime mes vranësirave dhe intervale kohore me diell. Për shkak të ndikimit të fuqishëm të masave ajrore të thata anticiklonike nuk priten reshje atmosferike, megjithatë një front i dobët i ftohtë ajror do të ndikojë në shtimin e vranësirave gjatë ditës së shtunën duke kushtëzuar edhe reshje të dobëta, afatshkurtra, lokale shiu e bore. Reshjet do të jenë mjaft të lokalizuara dhe nuk do të zgjasin shumë si dhe pritet të jenë të intensitetit kryesisht të dobët. Ky front nuk do të ndikojë shumë në uljen e temperaturave, respektivisht gjatë dy ditëve të fundjaves na presin temperatura maksimale nga 7 deri në 9 gradë Celsius në Kosovë, ndërsa në Shqipëri temperatura maksimale pritet të luhatet nga 15 deri në 17 gradë Celsius në viset mesdhetare.
Acari do të zbutet krejtësisht dhe edhe temperaturat minimale nuk pritet të ulen më shumë se – 4 gradë Celsius. Në shumë rajone pritet të jetë rreth -2 gradë Celsius.
Të hënën sipas të gjitha gjasave do të kemi përkeqësim të motit për shkak të ardhjes së një fronti më të fuqishëm të ftohtë ajror. Ky front do të kushtëzojë reshje shiu e pastaj edhe reshje kalimtare bore si dhe erëra të fuqishme fillimisht nga jugperëndimi e pastaj (në mbrëmje) nga veriu. Ky front do të na sjellë reshje kalimtare bore dhe ulje të përkohshme të temperaturave. Pas kalimit të frontit (një ditë ose dy) do të kemi stabilizim të plotë të motit dhe rritje të ndjeshme të temperaturave./MeteoBallkan
