Nga sot jemi nën ndikimin e masave të fuqishme ajrore anticiklonike me qendër në Evropën Qëndrore dhe perëndimore, por njëkohësisht kemi depërtimin e ajrit të ftohtë nga veriu i Kontinentit. Për këtë arsye është ftohtë dhe kryesisht thatë. Reshje dhe fjolla bore pati gjatë mëngjesit në shumë pjesë të Republikës së Kosovës duke përfshirë edhe Kryeqendrën. Ajri i ftohtë do të vazhdojë të qëndrojë në rajonin tonë këto dy ditë, por pastaj do të kemi një depërtim të lehtë të ajrit të nxehtë nga Mesdheu. Anticikloni i fuqishëm do të fillojë të tërhiqet në drejtim të veriperëndimit kah fundi i vitit. Siç shihet në foton kryesore tërheqja e anticiklonit në drejtim të Britanisë së Madhe do të lirojë rrugën për depërtimin e ajrit të ri të ftohtë dhe të lagësht në drejtim të rajonit tonë.
Si rezultat, afërsisht kah nata e Vitit të Ri në rajon priten reshje të reja bore, por për sasinë e këtyre reshjeve është shumë herët të spekulojmë, sepse kjo varet nga fuqia e ciklonit eventual që do të krijohej pas depërtimit të masave ajrore të ftohta dhe jostabile nga veriu. Për këtë dhe informacione tjera në postimet tona të ardhshme në meteoballkan.com./Meteoballkan.
