Java e re që po hymë dhe fillimi i Nëntorit do të na sjellë ndryshim në kushtet e motit, por në aspektin termik nuk do të ketë ulje të mëdha të temperaturave. Shirat aq shumë të nevojshme pritet të ndodhin gjatë kësaj jave deri në fillim të javës tjetër.
Në përgjithësi kjo javë do të karakterizohet me mot mjaft të ndryshueshëm. Nuk do të mungojnë intervale kohore me diell, vranësirat dhe reshjet e shiut. Po ashtu do të ketë edhe rrebeshe lokale shiu me vetëtima dhe bubullimë. Reshje bore vetëm në bjeshkët më të larta.
Masa jashtëzakonisht të fuqishme ajrore ciklonike nga Atlantiku do të depërtojnë në Evropë dhe Ballkan duke shkaktuar mot mjaft të stuhishëm.
Të ndalemi në viset tona ku sot e hënë siç po e shohim dita do të jetë krejtësisht stabile, e nxehtë dhe me diell.
Moti fillon të ndryshojë të martën, fillimisht në Mal të Zi priten rrebeshe intensive, pastaj në veri të Shqipërisë. Disa nga këto rrebeshe priten edhe në veriperëndim, veri dhe verilindje të Republikës së Kosovës, pra aksi ajror që nga Peja, Istogu përmes veriperëndimit të Drenicës, veriut dhe verilindjes së Kosovës do të përfitojnë rrebeshe shiu me vetëtima dhe bubullimë mbrëmjen e së martës. Lokalisht priten rrebeshe intensive, sidomos në veri dhe veriperëndim të Shqipërisë si dhe disa zona në jug të Shqipërisë, por këto stuhi nuk do të kapin shumë territore tjera.
Të mërkurën ulje të lehta të temperaturave, ndërsa pason një përmirësim afatshkurtër i motit. E Enjta sjellë një tjetër sistem frontal me reshje shiu më përfshirës në tërë rajonin. Reshje shiu të Enjten priten në gati tërë territorin e Shqipërisë, Kosovës, Maqedonisë së Veriut dhe Luginës së Preshevës. Edhe këto reshje nuk do të jenë aq intensive në tërë rajonin.
Përmirësim të shkurtër të motit presim përsëri të Premtën, ndërsa për fundjavë reshje të reja shiu, kësaj radhe duken më intensive në tërë rajonin.
Do të jenë këto reshje shumë të mirëseardhura për rajonet e goditura nga thatësia e madhe ekstreme.
Në aspektin termik nuk kemi ulje të mëdha të temperaturave, ngase do të jemi nën ndikimin konstant të rrymimeve ajrore të ngrohta nga jugu. Normalisht në kohën e vranësirave dhe reshjeve e rrebesheve të shiut temperaturat do të pësojnë ulje por jo të theksuara.
Ishte ky parashimi javor i motit për fundit e Tetorit dhe fillimin e Nëntorit. Ndryshime të vogla në parashikimi gjithsesi pritet të ketë. Për çdo ndryshim eventual do të njoftoheni me kohë në postimet tona të përditshme./METEOBALLKAN
