Sot ishim nën ndikimin e masave të freskëta ajrore që po vijnë nga veriu i Kontinentit. Vende-vende pati edhe rrebeshe shiu si në veri dhe lindje të Shqipërisë, disa rajone të Kosovës e posaqërisht në territorin e Republikës së Maqedonisë së Veriut ku pati rrebeshe të fuqishme lokale shiu me vetëtima dhe bubullimë.
Nesër në Kosovë pritet të kemi ngritje të temperaturave dhe intervale kohore me diell, megjithatë pasdite vonë dhe në mbrëmje priten zhvillime lokale vranësirash të cilat do të sjellin rrebeshe lokale shiu me vetëtima dhe bubullimë. Rrebeshe më të shpeshta dhe më të fuqishme shiu me vetëtima, bubullimë dhe mundësi edhe për breshër do të përfshijnë rajonin tonë të dielën dhe të hënën. Këto sisteme stuhish do të qarkullojnë ngadal për shkak të mungesës së erërave të fuqishme në shtresat më të larta të atmosferës dhe në këtë mënyrë do të prodhojnë sasi të mëdha reshjesh në të njëjtën hapësirë gjeografike, dhe si pasojë mund të pasojnë edhe vërshime lokale afatshkurtëra në ato rajone që do të preken nga këto stuhi./Meteoballkan
