Fusha të thata ajrore kryeisht antciklonike po mbretërojnë në rajonin tonë duke kushtëzuar mot të thatë dhe relativisht të ngrohtë. Frontet e ftohta dhe ciklonet nuk janë fare larg, por pa mundësi për të depërtuar tek dhe për të sjellur reshje të nevojshme atmosferike.
Gjatë ditës së nesërme pritet rritje të temperaturave dhe erëra jugore dhe jugperëndimore, herë pas here të fuqishme në Kosovë, por nuk pritet asgjë ekstreme. Temperaturat shënojnë rritje për shkak të afrimit të një fronti të ftohtë ajror nga veriu. Gjithnjë para frontit të ftohtë temperaturat rriten. Megjithatë fronti do dobësohet tërësisht kur të arrijë tek ne duke mos qenë i “aftë” për të na sjellur reshje atmosferike. Përndryshe ky front do të sjellë reshje të dendura shiu në Slloveni dhe Kroaci si dhe rrebeshe lokalisht të fuqishme shiu me vetëtima dhe bubullimë, edhe pse reshje nuk do të zgjasin shumë.
Të shtunën fronti arrin te ne në formë tërësisht të dobësuar duke ulur temperaturat, por pa reshje atmosferike. Mund të ketë ndonjë rigë afatshkurtër shiu në ndonjë rajon në Kosovë, por në përgjithësi edhe një fronti i dobët, i thatë dhe pa reshje atmosferike.
Të dilelën na pret ditë e vërtetë pranverore me rritje të temperaturave dhe shumë rreze diellore./Meteoballkan
