Frontet e ftohta do të fillojnë të ndikojnë edhe në atmosferën mbi rajonin tonë dhe kjo mund të vërehet edhe sot me vranësirat dhe rigat e dobëta të shiut të cilat u paraqiten sot në disa rajone, por temperaturat ende mbesin verore.
Ardhja e një cikloni përmes Evropes qendrore në drejtim të Evropes lindore i cili nesër pritet të shtrijë ndikimin e tij edhe në vendin tonë do të destabilizojë atmosferën e cila pritet të reagojë me krijimin e vranësirave konvektive të cilat pritet të kushtëzojnë rrebeshe lokalisht të fuqishme shiu me vetëtima, bubullimë dhe mundësi edhe për breshër. Rrebeshet nuk pritet të përfshijnë tërë territorin, por rajonet të cilat rrezikohen më së shumti nesër janë: gjysma veriore e Shqipërisë dhe gjatë mbrëmjes së vonshme edhe shumë pjesë të Kosovës.
Rrebeshet fillimisht do të fillojnë në Mal të Zi dhe pastaj do të përhapen në drejtim të Shqipërisë dhe Kosovës. Vende-vende priten rrebeshe intensive sidomos në veri deri në qendër të Shqipërisë. Rrebeshe lokalisht intensive priten edhe në disa vise të Kosovës.
Mot mjaft jo-stabil pritet edhe të shtunën me rrebeshe lokale shiu me vetëtima dhe bubullimë. Më së paku reshje priten në jug të Shqipërisë, Maqedoninë Veriore dhe jug dhe juglindje të Kosovës./Meteoballkan
