Temperaturat relativisht të ftohta kanë arritur deri në Kosovë nga veriu, por gjatë ditës së nesërme do të pësojnë ngritje të lehta kryesisht në zonat më të ulëta për shkak të trysnisë së temperaturave të larta mesdhetare. Për këtë arsye reshjet e dëborës në shumë rajone mund të shndërrohen në reshje shiu. Masa të lagshta ajrore vazhdojnë të arrijnë pandërprerë nga Mesdheu dhe për këtë arsye priten reshje intensive atmosferike të cilat mund të rëndojnë mjaft situatën në zonat e vërshuara nga sasia e madhe e reshjeve të ditëve të fundit. Në zonat kodrinore-malore priten reshje të dendura bore, por edhe në zona tjera varësisht nga temperatura. Po ashtu priten edhe reshje të përziera dhe shi të akullt vende-vende. Sasia e reshjeve do të jetë e madhe herë pas here në Kosovë veçanërisht në mbrëmje dhe gjatë natës së ardhshme. Po ashtu edhe në Shqipëri priten reshje të reja mjaft të dendura, veçanërisht në veri të vendit ku gjendja është mjaft të rënduar. Është jashtëzakonisht e vështirë për të përcaktuar saktë se ku do të bjerë borë e ku shi, por vlen të përmendet fakti se në Dukagjin, jug dhe lindje të Kosovës sipas modeleve priten më shumë reshje shiu se bore, ndërsa në viset tjera më shumë borë se shi.
Në Shqipëri dhe Maqedoninë Veriore priten vetëm reshje shiu, në veri dhe verilindje të Shqipërisë mund të ketë edhe borë në zonat malore, ndërsa reshje të dendura bore priten në lindje dhe veri të Malit të Zi, tërë Serbinë dhe Bosnjën e Hercegovinën.
Fillimi i javës do të kushtëzojë ulje të sërishme të temperaturave dhe po ashtu gradualisht edhe intensiteti i reshjeve atmosferike do të ulet. Nga mesjava vjen “goditja polare dhe siberike” dhe atëherë do të kemi dimër të vërtetë, por për këtë është herët të flasim./Meteoballkan