Masa të ngrohta ajrore pranverore do të depërtojnë nesër nga Mesdheu në drejtim të rajonin tonë Në fakt këto masa të ngrohta ajrore kanë depërtuar sot në shtresat e larta atmosferike, por për shkak të vranësirave nuk janë ndjerë në sipërfaqe.
Nesër na pret mot me intervale kohore me diell dhe rritje të ndjeshme të temperaturave, por priten edhe zhvillime të vranësirave të cilat vende-vende do të kushtëzojnë rrebeshe shiu me vetëtima dhe bubulimë.
Rrebeshet më të fuqishme nesër priten në territorin e Malit të Zi dhe pastaj në veriun e Shqipërisë. Zhvillime vertikale të vranësirave të cilat sjellin rrebeshin e fuqishëm të shiut nesër priten edhe në shumë vise të Kosovës, sidomos në rajonin e Dukagjinit dhe Drenicës, lokalisht edhe në vise tjera, por normalisht këto reshjet e verës nuk kapin gjithë territorin dhe kanë tendencë të jenë të izoluara në hapësira të ngushta gejografike. Reshjet do të mungojnë në gjysmën jugore të Shqipërisë dhe shumë pjesë të Maqedonisë së Veriut dhe Luginës së Preshevës, ose priten reshje fare të pakta.
Sa i përket aspektit termik nga nesër temperaturat rriten në të dy vlerat ekstremale dhe po ashtu vlenë të theksohet se nata e mbrëmshme ishte e fundit e kësaj sezone që kishte ngrica dhe brymë.
Temperaturat maksimale nga nesër rriten deri në 20 e më shumë gradë Celsius./MeteoBallkan
