Pas disa ditëve mjaft të nxehta dhe kryesisht stabile me zhvillime të rralla në rajone të pakta, nga dita e nesërme pritet të kemi zhvillime më të shpeshta dhe më të zgjeruara të vranësirave të cilat në shumë rajone pritet të kushtëzojnë rrebeshe lokale shiu me vetëtima, bubullimë dhe nuk përjashtohet mundësia edhe për breshër.
Kjo vlenë më së shumti për viset tona kontinentale kryesisht për Kosovë, Maqedoninë Veriore, Luginën e Preshevës dhe veriun e Malit të Zi. Në Shqipëri nuk priten zhvillime përpos veriut dhe verilindjes së vendit ku mund të ketë rrebeshe lokale shiu me vetëtima dhe bubullimë.
Gjatë pasditës së nesërme priten zhvillime konventive të vranësirave të cilat në shumë pjesë të Kosovës pritet të na sjellin rrebeshe shiu me vetëtima dhe bubullimë. Përjashtim mund të ketë jugu i Kosovës dhe disa pjesë tjera të Duakgjinit ku sipas modeleve nuk priten reshje nesër, megjithatë pasnsesër (e premte) reshje dhe rrebeshe lokale priten në shumicën absolute të territorit të Republikës së Kosovës.
Gjatë fundjavës na pret mot kryesisht stabil dhe pa reshje por jo shumë i nxehtë, ndërsa rrebeshet lokale me vetëtima dhe bubullimë mund të rikthehen nga fillimi i javës së re./Meteoballkan
