Furnizimi me ngrohje qendrore në Prishtinë do të fillojë tetë ditë para afatit të zakonshëm, që është 15 tetorit.
Ndërmarrja “Termokosi” ka njoftuar se ka përfunduar të gjitha përgatitjet e nevojshme, në koordinim të ngushtë me KEK-un dhe se ka filluar të marrë energji termike për të nisur sezonin ngrohës 2025/2026.
“Kjo është hera e parë në historinë e ekzistimit të ndërmarrjes, që sezoni ngrohës nisë 8 ditë para afatit të zakonshëm për fillimin e furnizimit, si reagim i menjëhershëm ndaj përkeqësimit të motit dhe në harmoni të plotë me ligjet në fuqi, përkatësisht me rregulloren e ZRRE-së për furnizim me energji”, thuhet në njoftim.
“Termokos” njoftoi se furnizimi përfshin mbi 25 mijë konsumatorë gjithsej. Duke qenë se sistemi i ngrohjes është shumë kompleks dhe delikat, ndërmarrja njoftoi tutje se procesi i fillimit të operimit do të zhvillohet me kujdes të shtuar, duke e ngritur gradualisht kapacitetin e pranimit dhe shpërndarjes së energjisë termike.
